Durante un bishita oficial na Parlamento Europeo, un delegacion di Parlamento di Aruba hunto cu Presidente di Parlamento a sostene diferente reunion importante cu representantenan europeo. Un di e encuentro principal tabata cu europarlamentario Marit Maij, miembro di Parlamento Europeo pa Hulanda, kende ta demonstra un interes special pa e islanan caribeño den Reino Hulandes.
Durante e combersacionnan, a pone enfasis riba oportunidadnan cu ta existi pa Aruba y otro islanan caribeño pa beneficia di diferente fondo y programa di cooperacion di Union Europeo. Un tema central tabata e programa Erasmus+, un iniciativa europeo cu ta ofrece posibilidad pa estudio, entrenamento profesional, intercambio academico y cooperacion internacional den educacion, hobenato y deporte. Segun informacion di Parlamento Europeo, Erasmus+ ta promove movilidad internacional, comparticion di conocemento y desaroyo di habilidadnan profesional y personal.
Marit Maij a enfatisa importancia di aumenta visibilidad di e Paisnan y Teritorio Ultramar (OCTs), incluyendo Aruba, den e proceso di decision europeo. E tambe a yama atencion na necesidad pa logra cu mas organizacionnan, institucionnan educativo y hobenan di e islanan haci uso di e posibilidadnan financiero cu Union Europeo ta ofrece. Recentemente, Maij a presenta preguntanan formal den Parlamento Europeo tocante e situacion y posicion especial di Aruba, Boneiru y Corsou den e contexto europeo.
Durante e reunion, a discuti con Aruba por fortalece su participacion den programa nan manera Erasmus+, Horizon Europe, LIFE y otro instrumento di financiamiento europeo. Segun Comision Europeo, Aruba ya ta beneficia di diferente programa europeo y a logra participa exitosamente den decenanan di proyecto Erasmus+ durante e ultimo añanan. E programa ta permiti estudiantenan, docente nan y personal academico participa den intercambio y colaboracion cu institucionnan den Europa.
Presidente di Parlamento a indica cu e encuentro a confirma e importancia di mantene contacto directo cu representantenan europeo pa asina percura cu interesnan di Aruba sigui siendo representa na nivel internacional. E dialogo cu Marit Maij a habri porta pa colaboracion futuro y pa un mihor acceso na oportunidadnan cu por contribui na desaroyo educativo, innovacion y fortalecemento institucional di Aruba.
E bishita ta forma parti di esfuerzonan continuo pa fortalece e relacion entre Aruba y Union Europeo, promoviendo mas cooperacion, intercambio di conocemento y acceso na recurso nan cu por beneficia futura generacionnan di Aruba.
