Nos ta rumbo pa un eleccion crucial dia 6 di december 2024. Despues di trabou serio, duro y cu hopi dedicacion a logra crea e espacio financiero cu Aruba tanto tin mester despues di e crisis ocaciona pa e pandemia y e mega debe laga atras pa Mike Eman. Despues di algun aña nos a logra crea un base financiero stabiel, y awor lo traha pa trece bienestar pa cada hogar na Aruba.

E dos reto mas grandi di nos hendenan ta costo di bida y poder di compra. Algo cu nos partido ta bon consciente di dje y a traha duro pa crea e espacio financiero pa por atende debidamente cu e puntonanan aki. Nan ta prioridad number 1 di MEP y si nos haya e confiansa di pueblo un biaha mas lo bay traha duro pa realisa cada un di e puntonan menciona aki bou.

Pa crea bienestar y alivia e peso di costo di bida halto, MEP ta propone un plan cu ta tene cuenta cu e dos aspectonan fundamental aki:1) Baha costo di bida y 2) Aumenta poder di compra di nos cuidadanonan.

Baha Costo di Bida

Nos ta enfoca riba manera di haci e producto basico mas alcansabel pa cada ciudadano. Den e contexto aki, nos lo traha pa:

  1. Amplia e canasta basico: mas producto lo wordo inclui pa sostene e nesesidadnan basico di cada hogar;
  2. Fortalece concientisacion pa control di prijs: nos lo enfoca ariba manera di mantene prijs husto pa e productonan basico;
  3. Habri posibilidad pa importa carni y galiña di Colombia: un medida pa trece diversificacion di importacion y mehora prijs;
  4. Yuda comerciantenan cu nan gastonan di importacion: cu obhetivo pa reduci gastonan y permiti producto mas barata pa nos pueblo.

Aumenta Poder di Compra di Nos Cuidadanonan

Nos kier pa cada hogar por sinti alivio financiero cu mas forsa pa cumpra su nesesidadnan. Nos plan ta inclui:

  1. Sigui aumenta pensioen pa nos hende grandi;
  2. Sigui aumenta sueldo minimo pa cada trabou tin un pago husto;
  3. Sigui aumenta onderstand pa esnan cu tin limitacionnan financiero;
  4. Reduci tarifa di loonbelasting: pa cada empleado por keda cu mas placa na man fin di luna of quincena;
  5. Reduci tarifa di coriente y introduci un subsidio ‘energie toeslag’ pa asisti famianan cu ta pasa necesidad, pa nan no keda sin awa ni coriente;
  6. Introduci subsidio ‘creche toeslag’: un ayuda directo pa mayornan cu tin yiu ta bay creche;
  7. Crea mas vivienda social y vivienda pagabel pa asegura cu cada Arubiano por tin un luga digno pa biba.

Esaki ta solamente e comienso di e plannan cu MEP tin pa 2025-2029. Danki na abo pa confia y sostene e vision y bon gobernacion di Movimiento Electoral di Pueblo. Mi ta termina e yamado aki cu un peticion di sosten y confiansa pa nos por sigui e trabou y bringa pa bienestar di cada hogar. Cu bo voto, nos por logra progreso pa cada ciudadano pa e proximo 4 aña di gobernacion.

RELATED ARTICLESMORE FROM AUTHOR