ORANJESTAD – Durante e tratamento di e caso diaranson ultimo, e abogado defensor a reaciona riba e acusacionnan di malversacion y labamento di placa. Segun e abogado, Ministerio Publico kier mustra cu ta un negoshi grandi tabata tin cu dispensacion y permiso.
Ministerio Publico kier a pretende cu tur e entradanan tabata basa riba pagamento di dispensacion, siendo no ta asina. Tabata tin un cantidad di eventonan cu a tuma lugar, pa asina genera entradanan.
Segun e abogado un di e evento nan tabata e campeonato di bowling y tambe un otro cu ta e concierto di Pasco, cu ta un show caminda artistanan conoci tabata presenta.
Partido AVP tabata bende carchi pa e evento aki na rason di 100 dollar. Un otro evento grandi, tabata e celebracion di cumpleaños di Paul Croes, cu tabata wordo festeha na grandi, aki tambe ta caminda e tabata haya donacionnan.
Partido di cual Paul Croes tabata forma parti di dje, cu ta partido AVP tabata exigi di su politiconan cu nan mester percura pa haya donacionnan di comerciantenan. Segun e abogado e partido tabata pidi e politiconan busca donacionnan den forma di placa, bebidanan alcoholico of otro cosnan tambe.
E abogado den su defensa a menciona un caso penal cu tabata tin contra Sr. Otmar Oduber na 2008, referente donacionnan cu e tabata haya pa AVP y cu mester tabata tin claridad for di unda e ta haya e placa, den e caso aki Oduber a wordo declara liber. E abogado a sigui bisa cu te ainda donacionnan ta sigui wordo duna na politiconan.
E Politiconan ta organiza eventonan pa recauda fonda pa hiba campanja.
Segun e abogado no tin un ley cu tabata mustra con un politico mester yega na placa pa hiba campanja.
