Manda e companianan estatal bancarota pa crea imagen internacional di Mike Eman
Mike Eman durante su gobernacion, a maneha cu un prioridad pa crea un imagen internacional pa su mes, gastando miyones di nos pueblo. Pero e unico imagen cu Mike Eman a crea pa su mes ta e imagen di un prome minister fracasa cu a hiba un maneho financiero bastante iresponsabel gastando miyones di fondo publico na su vision di energia cu nunca a mira luz di dia. Partido AVP awe ta cuestiona ahuste di tarifanan di awa y coriente mientras cu e partido berde nunca a tene cuenta cu placa di pueblo durante nan gobernacion di disaster y mas ainda, cu e vision di energia biyonario cu Eman tawata tin den su cabes, solamente nan a logra subi tarifa di awa y coriente.
Por menciona tambe, cu esaki tawata den tempo di bonanza. Kiermeen cu no tawata tin pandemia y niun otro crisis mundial. Y esaki ta e motibo berdadero cu Aruba no por a wanta un sla asina grandi di Covid. E berdad ta, cu si Eman a maneha fondo publico cu mas responsabilidad, Aruba lo tawata mas fuerte para ora cu pandemia a dal nos. Eman y su Partido, e partido berdadero di FRIENDS, FAMILY Y PRENSA CUMPRA, a gasta riba cosnan inecesario dunando ningun prioridad na futuro financiero di nos pais mucho menos na baha tarifa di awa y coriente.
PRIORIDADNAN ROBES DI AVP NA FRIENDS, FAMILY Y PRENSA CUMPRA:
GREEN CONFRENCE:
A uza e companianan WEB y Elmar, Utilities pa sponsor tur conferencia cu e unico meta pa crea un imagen internationalmente di Mike Eman. A paga na 2010 un orador Al Gore, 350 mil dollar. E companianan no por a wanta tur e gastonan aki mas y mester a hisa e tarifanan, esaki sin un guera, sin un pandemia mundial sino solamente pa derocha placa di pueblo na un individual FRIENDS & FAMILY di AVP, Mike Eman.
WUBBO OCKELS:
Mike Eman a cera un contracto di 250.000 Euro cu FRIEND di AVP, Wubbo Ockels pa e nabega cu su ‘Eco Ship Ecolution’ di Scheveningen pa Aruba. A monta un otro show y gaña pueblo y mundo cu e ta trahando riba un vision di energia. Un vision fracasa y gastando placa di pueblo. Un vision cu nunca a mira resultado. Pio ainda, unda cu nunca a logra baha tarifa di awa y coriente pa e pueblo cu a vota pe.
LEASE 2 AVION PRIVA PA VENEZUELA:
50.000 mil florin a costa cada avion unda Utilities NV a paga uno y e di dos a ser paga cu fondonan di RDA. FRIENDS, FAMILY Y PRENSA CUMPRA di AVP a biaha pa Venezuela pa firma un contracto pa habri refineria cu a keda scondi. Mike Eman y Mike de Meza a tira 3 fiesta asta uno cu e artista international DESTRA gastando miyones di placa di pueblo y nunca a logra habri e refineria.
BUKI MIKE EMAN ‘Visie, passie en lef’:
Mike Eman tawata kier a crea un imagen cu placa di pueblo unda tawata paga FRIEND di AVP, Rene Zwart of Zwart & Partners, 100.000,- Euro pa cada exemplaar pa mustra su vision di mentira y fantasia cu e tawata creando pa Aruba. Un vision cu nunca a mira luz di mision y mucho menos di ehecusion.
TNO:
Pa sigui cu e show cu Mike Eman a crea pa su imagen, nan tawata huur Italiestraat 46, FRIENDS & FAMILY di AVP, na AWG.16.545,30 pa luna, Alaves tawata huur 3 auto pa TNO cu pago di gasoline. Gastonan di deskundige advies cu tawata yega na sumanan di Afl.1.260.00, campaña di mercadeo na Afl.378.000,-. Tur esaki sin un resultado na beneficio di nos pueblo, un gastamento di placa di nos pais y nunca a logra baha prijs di awa y coriente pa e pueblo.
Awe, Mike Eman, Mike de Meza y AVP kier cuestiona ahuste di tarifanan di Utilidad unda cu mundialmente tin un crisis di energia crea pa un guera na Ukraine. Segun Mike, nan si tawata tin un vision, un vision den tempo di bonanza. Pero un vision cu a manda Aruba casi bancarota pa asina crea un imagen falso di nan lider di partido, Mike Eman.
Awe Partido MEP ta recorda bo ta con nan vision a costa nos pueblo miyones. E unico meta cu Mike Eman tawata tin cu su vision di energia tawata pa uza companianan estatal pa crea su imagen internacional y manda nan bancarota. #prohibilubida
