Pueblo di Aruba e siman aki a wordo sacudi cu un sorpresa ingrato ora cu a tuma nota di e complot cu RAIZ a cera cu AVP, pa ta specifico cu Benny Sevinger, pa hunto nan horta e presidencia di parlamento for di MEP y baha Edgar Vrolijk. Tur esaki pasobra Parlamentario Misha Raymond no a gusta e forma recto di proceder di Edgar Vrolijk.
E tristo ta cu hustamente RAIZ cu tin e cartera di Economia, pa ego y capricho, a prefera kibra acuerdo di gobernacion, puñala su partner di gobernacion y cera complot cu AVP. Tur esaki sin pensa tur e consecuencianan cu e tin pa nos Pais.
Un gobierno di MEP cu a crea stabilidad politico y financiero. Un gobierno di MEP cu a crea prosperidad pa nos pais danki na un turismo floreciente, un maneho financiero responsabel, creando cuponan di trabou pa nos yiunan di tera. Comercio tabata premira cu gran entusiasmo e ‘high season’ cu lo a priminti di bira esun di mas floreciente den historia di pais Aruba. Awo pais Aruba mester bay enfrenta un eleccion causa pa e complot RAIZ/AVP puro pa capricho di mucha malcria cu no a haya su kier.
SED PA PODER:
Pero kico RAIZ a prefera di haci djis pa e haya poder? El a prefera traiciona su partner di gobierno. RAIZ a prefera cera complot cu AVP.
RAIZ a prefera brasa corupcion djis pasobra nan no ta gusta Edgar Vrolijk.
CON RAIZ A BRASA CORUPCION:
RAIZ a uni cu AVP pa nan uni pa horta e presidencia di parlamento for di MEP. Pero pa por a haya e mayoria ey Benny Sevinger su voto tabata decisivo pasobra Ryçond do Nascimento a anuncia di lo no forma parti di e complot.
Benny Sevinger desde cu el a wordo condena pa corupto, pa un di dos bes, pa tres huez, hayando aumento di castigo, ya no tabata presenta mas den parlamento a pesar di ta ainda cobrando su salario di parlamentario.
Pero dialuna 9 di september, dia di e votacion pa presidente di Parlamento, diripiente Benny ta den sala di parlamento y su bos a resona PRO pa hunto cu RAIZ horta e presidencia for di MEP. Acuerdo di gobernacion entre RAIZ y MEP a wordo viola pa nos partner di gobernacion esta RAIZ.
Pero pa su diamars 10 di september, dia di apertura di aña parlamentario, ya Benny no a presenta mas den parlamento di Aruba.
Un complot nunca antes visto. E “integridad” di RAIZ a brasa e corupcion di AVP pa kibra y viola e acuerdo di gobernacion MEP/RAIZ.
Awo ata Aruba den un incertidumbre atrobe causa pa e partido cu tin economia di Aruba como su cartera, causa hunto cu AVP cu a pone Aruba na borde di bancarota, Benny hunto cu Marisol Tromp a haci e obranan di corupcion di tereno di mas grandi den historia di Aruba. Esey ta e partido cu RAIZ a forma complot cu ne.
MEP a demostra di tin interes di Aruba y nos pueblo na prome lugar y asina nos lo sigui traha pasobra nos mester proteha Aruba di politiconan corupto y caprichoso cu solamente kier sacia nan sed di poder.
