Partido MEP a tuma nota di un comunicado di Mike Eman tildando Premier Evelyn Wever-Croes di a haci un show politico cu Secretario di Estado van Huffelen. E ta cuestiona cu Conseho di Minister di Reino no a apodera e Secretario di Estado y cu awor Premier Wever-Croes a haci cosnan peor cu Hulanda.
Pa cuminsa, tur hende por a lesa e decisionnan di Conseho di Minister di Reino den cual a apodera e Secretario di Estado y e mes a bis’e varios biaha. Pa di dos, ta dicon awor diripiente Mike Eman, of esun cu a scibi e comunicado p’e, tin miedo di confrontacion cu Hulanda? Siendo constantemente Mike Eman ta ataca Hulanda y hasta ta yama Hulanda pa burdugo? Partido MEP ta lamenta con cada biaha cu Mike Eman papia, e ta recuri na mentira.
Loke Premier Evelyn Wever-Croes a haci ta subi avion y bay purba un ultimo biaha di convense Hulanda di loke ta husto pa mas di 5000 mama y tata di famia. Y despues, apesar di tur riesgo cu un decision asina por trece cu n’e, Premier Evelyn Wever-Croes a tuma e miho decision den bienestar di mas di 5000 mama y tata di famia.
Si pa AVP esey ta un show politico, ta keda pa nan consenshi. Pa partido MEP esaki ta un acto heroico, cu ta den beneficio di nos pueblo.
Ta comprendible cu e decision aki di Premier Evelyn Wever-Croes y su Gabinete, a cay den masha mal tera cerca AVP. Pero tampoco ta necesario pa recuri na mentira ni weganan infantil. Awor nos tin un Gobierno cu ta lora manga, traha duro pa enfrenta tur reto. No manera Mike Eman cu, pa poco presion, a bay den welga di hamber. Esey si di berdad tabata un show politico. Y esaki, pueblo nunca lo lubida. Pueblo nunca lo lubida cu enbes Eman a enfrenta su responsabilidad y subi avion y bay regla asunto na Hulanda, el a prefera di bay den welga di hamber y pone cara di pueblo na berguensa.
