“Cada parlamentario tin e deber pa percura pa comunidad mantene e confiansa den Aruba su Parlamento”
ORANJESTAD – Diabierna 17 di September 2021, a tuma luga den sala di Parlamento e huramentacion di esnan cu lo representa pueblo den Parlamento di Aruba pa e periodo 2021 – 2025. Partido MEP ta sumamente orguyoso pa presenta e Parlamentarionan nobo pa Fraccion di MEP y ta desea cada un forsa y sabiduria den nan funccion como defensornan di Pueblo.
E huramentacion di e Parlamentarionan nobo a tuma luga durante di un reunion publico den Parlamento di Aruba. Ta trata di seis persona di MEP y dos persona di RAIZ. Pa Partido MEP a huramenta: Señor Ady Thijsen, señora Shailiny Tromp-Lee, señora Setty Christiaans-Yarzagaray, señora Darlaine Guedez-Erasmus, señor Alvin Molina y señor Marco Berlis. Pa Partido RAIZ a huramenta: señora Micheline Raymond y señor Raymond Kamperveen. Asina oficialmente ta duna inicio na Parlamento nr. 11 cu e Parlamentarionan nobo.
Ademas Partido MEP ta felicita lider di Fraccion di MEP nobo, Señora Shailiny Tromp-Lee y Presidente di Parlamento sr. Edgard Vrolijk, deseando ambos hopi exito.
Un aspecto hopi importante cu Lider di partido MEP y Prome Minister di Aruba Evelyn Wever- Croes ta enfatisa ta cu cada parlamentario tin e deber pa percura pa comunidad mantene e confiansa den Aruba su Parlamento. Pa esaki, respet pa otro a pesar di diferencia di ideologia, diferencia di opinion y/of diferencia politico ta esencial. “Cu respet bo ta gana confiansa!’
Partido MEP ta desea cada Parlamentario hopi forsa, inteligencia, pasenshi y hopi salud pa por keda traha semper na bienestar di nos pais den e proximo 4 añanan.
