Diaranson anochi na Cede di Partido Movimiento Electoral di Pueblo (MEP), den un sala completamente yen, lider di partido Evelyn Wever-Croes a anuncia e lansamento di e candidato nobo cu lo representa MEP den e eleccion binidero. E tabata sigur un anochi cu hopi emocion na momento cu a presenta Sharissa Arends-Tromp como e candidato cu lo representa MEP, y su bario di Paradera den e proximo eleccion.
Manera ta conoci, Sharissa no ta un desconoci den comunidad. E ta yiu muhe di señor Leo Tromp den feliz memoria, y di señora Ella Tromp-Yarzagaray cu tambe tawata candidato di MEP dedicando su mes na enseñansa y haci contribucionnan significativo pa pais Aruba. Un persona cu den su añanan como politico a haci un impacto grandi como ser femenino.
Sharissa ta casa di señor Mario Arends y hunto nan tin 2 yiu muhe, kendenan ta su inspiracion pa traha pa un miho Aruba, y laga un pais atras cu por ofrece e futuro generacion oportunidadnan grandi pa acumula experiencia.
Tambe Sharissa tin un experiencia laboral amplio. El a traha den sector priva na AAA y Algemene Rekenkamer, tabata tin su mesun negoshi di Property Management, y a sirbi como lider di e proyecto di “Sociaal Crisis Plan”. El a indica cu e temporada cu el a traha den sector social tambe a sirbi como un inspiracion pa e tuma e paso aki, pa asina e por duna tur di su mes pa yuda esnan cu mas ta den necesidad.
“Pa mi ta un gran honor pa por afilia mi mes na e ekipo di Movimiento Electoral di Pueblo. Un partido cu ta encabesa pa un lider inspirador, un dama cu den momentonan dificil a sa di demostra su capacidad pa guia nos pais padilanti. Nos a mira e esfuersonan di Movimiento Electoral di Pueblo ora nos pais a confronta retonan grandi y a traha duro pa garantisa un pais unda tin stabilidad y progreso.
“Mi deseo den e temporada aki ta pa conecta cu mas di boso cu ta posibel. Mi ta desea pa boso conoce mas di e vision di Movimiento Electoral di Pueblo, mi compromiso personal, y dicon considera pa duna nos un bes mas e sosten y confiansa den e proceso electoral 2024. Mi lo kier tende di boso. Boso opinion, sugerencia y comentarionan ta hopi importante den e trayecto aki” Sharissa a termina bisando.
Lider di MEP, Evelyn Wever-Croes, den nomber di Partido MEP y e famia grandi di MEP, ta yama bon bini na candidato nobo, Sharissa Arends-Tromp y ta dese’e hopi exito. Lider di MEP a expresa cu conociendo mayornan di Sharissa, yiu muhe di candidato di pasado riba lista di MEP, señora Ella Tromp-Yarzagaray, Sharissa tawata tin e miho role model den su bida y awo como politico e tin un base fuerte y firme pa traha riba e areanan di su interes.
“Politica no ta algo nobo pa bo, bo tin un role model banda di bo cu a inspira abo y ami y mi ta sigur mas hende muhe den politica. Tempo cu señora Ella tabata minister y Aruba tabata den un situacion financiero hopi malo, E ta esun cu a carga e responsabilidad y a saca cara di tur hende muhe aki na Aruba. Mi ta gradici bo pa a uni bo mes como candidato di Partido MEP y ta deseabo exito cu e reto nobo aki”, Lider di MEP a expresa.
