Arubianonan ta keda sin voz den nos propio tera.
Na Aruba, un situacion serio ta desaroyando. Pa falta di e afan di Dowers pa legalisa mas di 6000 stranhero esaki ta perhudica e indigenanan Arubiano. Cada biaha mas Arubianonan no por inscribi of reinscribi den Registro di Poblashon (Censo). Sin e inscripcion aki, un hende no ta existi administrativamente. Y sin existencia den sistema, e consecuencianan ta grandi y grave.
Gobierno ta indica cu e problema ta resultado di hopi peticion, abuso di sistema, di cita y falta di capacidad na Censo. Tur esaki por ta berdad, pero ningun di esakinan no por ta un excusa pa kita un derecho fundamental di su propio pueblo: e derecho di ta reconocí como habitante di nos propio pais.
Un sistema cu ta castiga nos propio pueblo.
Locual ta pasando awe, ta cu e cuidadano ta pagando pa falta di planificacion y maneho. Sistema di cita online ta cera, alternativanan no ta cla, y comunicacion cu publico ta insuficiente. Arubianonan cu ta bolbe despues di studio of trabou den exterior, famianan cu ta trata na pone nan documentacion na ordo, y hobennan cu mester inscripcion pa prome biaha, tur ta topa un muraya administrativo.
E problema no ta cu hende kier inscribi.
E problema ta cu gobierno durante añanan no a inverti suficiente den capacidad y modernisacion. No a preveni abuso di sistema di manera efectivo.
No a pone procedimentonan alternativo cla ora sistema ta faya.
Inscripcion no ta un fabor.
Inscripcion na Censo no ta un fabor di gobierno, ni un privilegio. Ta un obligacion legal di estado y un derecho basico di cada cuidadano. Ora Arubianonan mester warda lunanan of mas sin por inscribi, esaki ta afecta directamente e acceso na cuido di salud,
oportunidad di trabou y seguridad social, derecho di voto y participacion democratico y
documentonan di identidad. Esaki ta mina confiansa den gobierno y cu rason.
Falta di transparencia.
Loke ta haci e situacion mas serio ainda, ta falta di transparencia. Cuanto tempo e “medida temporal” aki lo dura? Cua solucionnan provisional ta existi? Ken ta haya prioridad y ariba cua base? E pueblo ta keda den incertidumbre, mientras nan bida diario ta keda para.
Un gobierno responsabel ta comunica cla, ta implementa solucionnan temporal y ta pone su propio pueblo prome.
Ta ora pa asumi responsabilidad
Gobierno di Aruba mester actua di manera urgente:
Permiti inscripcion di emergencia pa Arubianonan;
Reforsa Censo cu mas personal y recurso;
Comunica di manera transparente, continuo y honesto cu publico;
Reconoce abiertamente cu esaki ta un fayo administrativo, no un fayo di ciudadano.
Un pais cu no por registra su propio pueblo indigena, ta perde mas cu control administrativo. Ta perde confiansa.
Arubianonan indigena merece mihor den nos propio tera.
