Partido RAIZ a tene su di seis session di Academia di Bon Gobernacion 2025 (ABG) riba e tema “Good Corporate Governance”, dirigi pa Sr. Jossy Laclé, un di e pionero y figura principal den tereno di gobernacion corporativo na Aruba.
Durante e presentacion, Sr. Laclé a enfatisa cu “Good Corporate Governance ta trabou di ser humano”. Segun Lacle, e concepto no ta limita solamente na ley of reglamento, sino ta un compromiso personal pa traha cu integridad, transparencia y responsabilidad den tur nivel di organisacion.
E la splica cu bon gobernacion mester crea un balans cla entre e RvB (Raad van Bestuur), e RvC (Raad van Commissarissen), e RvT (Raad van Toezicht) y e Gobierno como accionista, pa garantisa transparencia, supervision y un sistema di ‘checks and balances’ cu ta fortalese confiansa di pueblo.
E presentacion a tuma luga den momento caminda ta tin hopi dialogo riba e Rijkswet y su posibilidad di implicacion pa autonomia, responsabilidad y control institucional den Reino Hulandes.
Sr. Laclé a subraya cu esaki ta mustra hopi cla con Good Corporate Governance ta un tema vital, no solamente pa organisacion nan publico y semi-publico, sino tambe pa e relacion entre Aruba y Reino.
Ademas tin e topico di integridad y transperencia den servicio publico a bira centro di atencion nacional. Aunke algun asunto ta den investigacion y mester keda den man di autoridad competente, nan ta sirbi como un recordatorio cu e confiansa di pueblo ta depende tanto di ley como di e apariencia di honestidad.
Sr. Laclé a bisa cu “transparencia, control mutuo y respeto pa regla ta e fundeshi di confiansa entre institucionnan”. Den un sistema democratico, un gobierno no solamente ta goberna su mes bon mientras e ta defende su autonomia, pero tambe ta exigi e mesun nivel di integridad y claridad di otronan. Sr. Laclé a pone enfoke riba importancia di evita conflicto di interes, tene comunicacion cla entre e organonan di supervision y direccion, y implementa un cultura di responsabilidad na tur nivel di institucion.
Partido RAIZ a enfatisa cu educacion y concientisacion ta e base pa crea un generacion di lidernan etico cu ta pone e bienestar di pueblo na prome lugar. E programa Academia di Bon Gobernacion ta sigui traha pa fortalese liderazgo civico y forma ciudadano cu ta compronde e balor di gobernacion cla y responsable.
E Landsverordening Corporate Governance lo hunga un rol fundamental den formalisa y fortifica e cuadro di gobernacion di Aruba, sigurando un sistema duradero y legitimo pa futuro. Sr. Laclé a clausura su presentacion bisando cu: “Integridad no ta automatico, e ta un esfuerso di tur dia cu ta refleha e nivel di maduresa di un pueblo”.
E siguiente session di ABG 2025 lo tuma lugar diahuebs 13 di november na Botica Oduber Building den Caya Betico Croes riba e tema “Reforma Democratico”, cu invitado special Sr. Miguel Mansur. Partido RAIZ ta invita pueblo di Aruba pa join nos pa un otro session educativo, cu ta prepara lider y ciudadano pa un futuro di transparencia, integridad y bon gobernacion.
