Partidonan di carta filma despues di a come brownies di marihuana na pia di trabou, haltura a coy y nan no tabata por a controla nan mes.
London, Inglatera;
E compania di post Britanico, Royal Mail a cuminsa cu un investigacion despues di a mira riba medionan social un video den cual su empleadonan, tabata bou influencia tabata halto halto na pia di trabou.
Esaki pa motibo cu un rato prome, prome cu nan a bay parti carta nan a come algun brownies cu tabata contene marihuana. E delicia aki nan a hay’e den un pakete cu tabata pa mas cu un luna na e oficina di post y no a wordo reclama pa su doño..
Den e filmacion por a scucha un persona bisa: “Tur e partidonan di carta di Clapham( na e parti zuid di Londen)pa ekibocacion a come e browniesnan di marihuana y mi mester a lanta un pa un, paso nan tur tabata halto halto.” E video aki mientrastanto a wordo kita for di medionan social.
Riba e video por a mira un partido di carta asina halto, cu e no a ni pusha su garoshi di post.Tambe por a scucha un di su coleganan grit’e “bo ta halto.”
Den filmacion por a mira tambe un otro partido di carta sinta abou y cu no por a lanta. Den e filmacion, e ta bisa cu e la come cuater brownie.
Un otro tabata bisa cu e la come dos brownie di marihuana.
E compania di post Royal Mail a tuma e caso aki hopi na serio,nan ta investigando y evaluando ki paso nan lo bay tuma y si nan lo por bin cu sancionnan disiplinario pa e empleadonan aki.
E brownies nan di marihuana tabata den un pakete cu tabata tin mas cu un luna warda na e oficina di post y cu niun hende a bin reclame. Riba e pakete tabata tin skirbi ‘Edibles by Pablo Chocobar.’
