Diasabra 11 di december tin un mercado di artesania den e Hardin di Shoco na Savaneta 91. E artistanan local Sheila Werleman, Trudy Lampe, Estella Thode, Ana Luidens, Olis Pina y Merveline Geerman lo ta presente na e mercado aki cu un variedad di piesa. E actividad di Pasco na Savaneta ta di 17:00-22:00.
Prome cu fin di aña, e artistanan local aki kier a ofrece publico e oportunidad pa bin wak y hasi arte den un ambiente di pasco, e biaha aki pariba di brug. Na e manera aki e grupo di artista kier yuda trece actividad den tema di arte y artesania pariba di brug door di uni forsa y colabora cu otro.
Entre e artistanan local aki tin diferente disciplina di arte y artesania ta wordo representa.
Sheila Werleman ta un pintor y ilustrado cu ta specialisa den aquarel (watercolor). Su pinturanan ta capta e bunitesa di nos paisahenan, e herencia di nos casnan di cunucu y e puresa di nos flora y fauna.
Cu mas di 30 aña den mundo di artesania, Trudy Lampe ta contribui den e arena artistico door di traha cu klei cu e ta colecta na Aruba mes. Tambe special pa e temporada aki, e ta pinta paisahenan di Aruba riba balanan di pasco.
E artista local, Estella Thode, ta wordo inspira door di lama y ta incorpora su inspiracion den su pintura. E ta conoci tambe pa e matanan di divi traha cu waya di koper riba un base di piedra local di quartz.
Pa e temporada di pasco aki, Ana Luidens y Olis Pina a crea un linea di entre otro casnan di cunucu, casitanan y chozanan cu recycled material. E idea ta cu nan por wordo husa como decoracion pero tambe nan por wordo husa pa traha un “Christmas village”.
Merveline Geerman ta yuda desaroya e practica di arte di mosaic na Aruba. E ta traha mural, borchi y piesanan decorativo cu atencion pa e cultura y naturalesa local. Diasabra 11 di december, e ta ofrece tambe na publico un workshop di mosaic.
E workshop di mosaic ta un session creativo pa publico unda por hasi un “coaster” di mosaic den tema di pasco. Tin diferente diseño cu e participante por kies. Orario pa participa na e workshop ta 17:30-18:30, 19:00-20:00 of 20:30-21:30. Pa por registra tuma contacto cu e team organisatorio via 5934821 of por manda un mensahe via e facebook pagina “Pariba di Brug”. Prijs ta AWG 45 y ta inclui un bebida refrescante.
Durante e atardi, lo tin demostracion di con ta traha un pesebre di pasco cu recycled material. Cu e actividad aki e team di Pasco na Savaneta kier stimula hende pa traha nan mesun pesebre y mucho mas den e temporada di pasco. E idea ta cu grandi y chikito cu kier yuda traha e pesebre aki ta bon bini pa hasi esaki. Na e manera aki nos ta aporta na preserva e artesania aki.
Pa mas informacion tocante e actividad Pasco na Savaneta, por lesa mas riba e facebook pagina “Pariba di Brug”.
