Si tur hende por a realisa con poderoso oracion por ta pa esun cu ta kere, anto hopi hende lo ta biba leu for di preocupacion, zundramento y murmuracion diario, y confia tur cos den man di Dios.
Laga nos tene cuenta cu si oracion no tabata asina poderoso Hesus Cristo lo no a sinja su disipelnan con pa haci oracion.
Oracion ta poderoso y tin tur clase di beneficio, pa esun cu ta kere, pero si un hende no ta kere, of no kier kere, y su curason ta yena cu duda, mihor e tuma tempo arepenti, y confia den Senjor y despues haci oracion y nota e cambio pa su mes.
Un bida sin oracion ta un bida bashi,pasobra oracion mester ta nos forma di bida, no algo superficial, pero algo profundo , pasobra ora nos ta haci oracion nos ta comunica cu Dios, y Dios ta scucha y comunica cu nos bek, pasobra Dios por cambia tur situacion.
No ta pornada Hesus ta bisa den Mateo 7:7-8 : Pidi y lo wordo duna na boso, busca y boso lo hanja,bati y lo wordo habri pa boso. Pasobra ken cu pidi ta ricibi,y esun cu busca ta hanja,y pa esun cu bati lo wordo habri. Tur esaki por wordo logra pa medio di oracion cu Fe den Dios.
Caminda tin murmuracion, y zundramento, tardansa ta drenta , pasobra murmuracion y zundramento y tiramento di falta riba hende enbes di tin fe den Dios, no ta cambia ningun situacion.
Laga nos tene cuenta con e pueblo di Israel tabata murumura contra Dios den desierto, y tira falta riba Moises ,Dios a bisa Moises te ki dia e pueblo aki ta sigi murmura contra Mi, y nos tur sa cu pa e motibo ey nan a muri den desierto enbes di sali for di desierto.
Hesus a splika su disipelnan bon cla cu pa motibo di nan incredulidad nan no por a saca un demonjo for di un mucha bisando: Ma e sorto aki no ta sali sino ta pa medio di oracion y yunamento.( Mateo 17:20).
Ora nos bida ta bashi di oracion, ora nos bida di oracion ta zwak nos ta falta autoridad y poder, y ta resulta dificil pa enfrenta poder di scuridad.
Ta masha importante pa sinja nos yuinan haci oracion for di chikito, y para hunto cu nan ora tin obstaculo den nan bida, cu nan mester vence y guia nan den oracion pa asina nan por experiencia poder di Dios.
Mucha nan mester sa cu e bully causa na scol por wordo para cu oracion for di cas, cu e pelea cu nan tin cu enfrenta por cancela pa medio di oracion, cu tur sorto di sonjo malo, y atake diabolico por wordo kibra pa medio di Oracion.
E fundeshi di un iglesia ta oracion, pasobra sin oracion e Iglesia no ta crece, pesey diabel ta haci tur locual ta posibel pa hende no uni hunto y haci oracion den iglesia, pasobra eynan Mateo 18:19-20 ta bira realidad.
1 Samuel 1:20 pa medio di oracion Anna un muher steriel a hanja yiu.
Santiago 5:16-17 ta recorda nos con Elias a haci oracion y awacero a bolbe cay.
Hechonan capitulo 12 Pa motibo cu e iglesia tabata haci oracion Pedro a wordo libra for di prison,
Daniel capitulo 6 pa medio di oracion, un angel a presenta den cueba y sera boca di leon.
Isiaias capitulo 37 pa medio di oracion un pais completo a wordo salba for di e enemigo.
Ta tempo pa nos bolbe bek na Oracion.
Sinceramente, Pastor Marcel Balootje
