”Pasobra El a mira ami, su sirbido humilde, cu bon wowo. For di awor tur generacion lo yama mi feliz, pa motibo di e cosnan grandi cu Dios poderoso a haci pa mi. Su nomber ta santo!” Lucas 1, 48-49

Den Lucas 1,48-49 ta mustra e humildad di Mama Maria. E ta reconoce cu tur loke ta grandi den su bida no ta bini di su mes, sino di Dios. Maria no ta busca honor; e ta alaba Señor, kende a scog’e pa bira Mama di Hesus. E Asuncion di Mama Maria ta nifica cu, na final di su bida terenal, Dios a tuma Maria cu curpa y alma den gloria di cielo. Maria no a subi pa su propio poder, manera Hesus a haci den su Ascension. Ta Dios mes a trece cerca djE. E misterio aki ta confirma cu Dios a haci cos grandi pa Maria. Su Asuncion ta un señal di speransa pa nos: morto no tin ultimo palabra. Manera Maria, nos ta yama pa confia den Dios, biba humildemente y spera bida eterno cerca dje. Lucas 1,39-56 no ta conta directamente tocante e Asuncion, pero e ta yuda nos compronde e privilegio grandi aki. Dios a haci cos grandi den Maria: El a scog’e pa ta Mama di su Yiu, El a yen’e cu gracia y El a conserv’e fiel te na final.

Oracion: Mi Señor y mi Dios, manera Mama Maria, yuda mi keda humilde, confia den Bo, reconoce Bo obranan grandi y cana fielmente den speransa di bida eterno cerca Bo. Amen.