Awe Banco Central di Aruba (BCA) ta publica su di dos Position Paper den e area di pago titula ‘Enabling Instant Payment Innovations in Aruba’, cual ta confirma e ambicion y vision pa sigui modernisa e panorama di pago y asina mehora substancialmente e experiencia cu e proceso di pagamento na Aruba. E Position Paper aki ta duna un bista riba e estado actual di pago, ta describi e estado ideal di pago, ta trece dilanti e ‘use cases’ cu tin mas potencial pa mehora e experiencia cu pago y ta conclui cu un perspectiva pa e futuro cercano.
Den su prome Position Paper, titula ‘Roadmap towards a modern payment infrastructure in Aruba’ publica na aña 2017, BCA a defini tres ambicion cu e meta di mehora e panorama di pago na Aruba. Na 2020, como parti di e roadmap aki, BCA exitosamente a reemplasa su infrastructura di pago anterior pa un solucion di pago instantaneo nobo yama I-Pago. I-Pago ta un paso importante pa por sigui evalua y ehecuta proyectonan nobo di modernisacion di sistemanan di pago, y asina beneficia optimalmente di e infrastructura di pago nobo aki.
Cu e di dos Position Paper, BCA ta defini tres ‘use cases’ cu tin un potencial pa implementa usando e infrastructura di I-Pago, teniendo tambe e punto di bista di e mercado, e rekisitonan di companianan y consumidornan, y e sistemanan di pago y innovacion cu ya a implementa exitosamente rond di mundo den consideracion. E tres ‘use cases’, cu tin potencial pa ehecuta, ta ‘person-to-person payments’, ‘in-store payments’ y ‘e-commerce payments’. E ‘use cases’ menciona anteriormente por ofrece e maximo beneficio pa tur ‘stakeholders’, di consumidornan pa companianan, pa cual motibo e implementacion di e ‘use cases’ aki ta esencial pa sigui modernisa e panorama di pago na Aruba.
Observando e tendencianan rond di mundo, BCA ta nota innovacionnan tumando lugar den varios area y cu ta atravesa tur continentenan. Tecnologianan nobo ta sigui duna desafio na e sistemanan di pago existente, haciendo innovacion continuo un rekisito. BCA tin innovacion halto riba su agenda y lo kier percura pa e producto y servicionan nobo di pago sigui ta eficiente, confiabel y sigur, y cu nan ta beneficia tur ’stakeholders’, incluso e consumidornan.
E Position Paper ‘Enabling Instant Payment Innovations in Aruba’ ta disponibel desde awe riba BCA su website, www.cbaruba.org.
