E balor di famia, no ta wordo midi cu placa, tampoco cu propiedad, pero pa medio di e amor y unidad cu mayornan ta sembra den dje.
Mihor un famia uni, humilde cu ta biba stimando otro y contento cu locual cu nan tin, den presencia di Dios, cu un famia rico y arogante, caminda cada ken ta biba pa nan mes, sin amor pa otro, sin respet pa nan mes , tampoco pa Dios, pasobra sin nan sa, nan ta pober, pasobra nan no ta uni.
Fortaleza di un famia ta bini for di Dios y nan union, esnan cu nan deber ta pa proclama y declara union den cas ta e mayornan. Pasobra ningun yiu, no por wordo balora, y halsa mas cu un otro, pasobra ora abo como mayor, coopera den esey , bo ta cobando un buraco di malcriansa y rechaso pa bo mes yiu.
Pago di malcriansa na un mayor ta ora e yiu cu e a malcria lanta contra dje, pasobra malcriansa no solamente ta haci bo yiu orguyoso, pero e ta lanta un spirito di rebeldia den e mucha , cu e no tin respet ni pa hende di cas, ni tampoco riba caya.
Pasobra pa malcria un mucha e mayor mester bay contra e palabra di Dios cu ta para scirbi den Efesios Capitulo 6 vers 1-4, y tur biaha cu nos desobedece Dios su palabra e consequencia ta bini pa nos.
Como mayor bo mester balora bo famia, poniendo bo atencion, no solamente cu paña, placa, salimento etc, pero cu amor y dedicacion, den cual bo ta formando bo futuro generacion y nan mester di tur atencion cu ta abo so como mayor por duna , un atencion cu no ta na benta, e ta un deber.
Cada palabra cu sali for di bo boca como mayor mester ta constructivo alabes treciendo coreccion, y mustra cu hunto nos por logra , pasobra hunto nos ta fuerte.
Si como mayor bo tin e curashi di zundra y bisa cu bo yiu no ta sirbi, djis cay sinta y pensa un rato ta yiu di ken e ta, y lanta para wak den un spiel, pidi Dios pordon, pa Dios yuda bo pa haci miho.
Dios den su palabra a laga un Tesoro atras pa nos tur cual ta Salmo 133 cual ta bisa : Mira ki bon y ki bunita ta pa rumannan biba hunto den harmonia. Dios ta aprecia union, e Tata , e Yiu, Y e Spirito Santo ta hunto. Si bo kier mira manifestacion di Spirito Santo den bo cas,trece union den bo cas.
Den tur hogar mester tin union,pa e Spirito Santo por baha, na Jerusalem riba e 120 persona nan tabata uni den oracion, (Hechos Capitulo 2 vers 1-4).
Awendia hende ta prefera laga Dios afo y biba den desunion cu otro, pensando cu asina nan lo logra , esey ta un gran mentira .
Mayoria caso di division den famia y divorcio ta pa motibo cu hende no ta balora locual cu nan tin y ta cay den adulterio, pa falta di aprecio na otro. ( Efesios Capitulo 5 v 25)
Ora un mucha ta balora na su cas y no malcria, e mucha ey no por permanece riba caya , tampoco ta bira miembro di ningun gang (geng) pasobra e amor y calor y respet cu tin na cas, ningun caminda e por hanje.
Ora nos balora nos famia nos ta imita Dios.
Sinceramente,
Pastor Marcel Balootje.
