Si nos pone un bijbel den sala, un den camber, un den cushina, y un den baño habri na Salmo 91 nada no ta sosode si nos no tuma e decision pa biba bao di e sombra di e Altisimo.
Pasobra hopi hende kier proteccion di Dios pero nan no kier biba pa Dios.
Nan kier usa e palabra di Dios manera un amuleto.
Y esey Dios no ta permiti, Dios sa bon, bon ken ta esnan cu ta cu Dios di henter nan curason.
Si bo pone un garetia den bo garashi e no ta bira un auto, awel mescos proteccion di Dios no ta un show e ta un entrega total na Dios, y asina Dios lo cumpli cu su promesa di proteccion.
Den Salmo 91 vers 1-8, Señor ta splika bon cla na nos e responsabilidad cu E tin cu nos ora nos ta entrega nos mes na Dios y confia den Dios.
E locual cu Dios ta ofrece na nos , no ta compara cu ningun seguro na mundo, pasombra ningun seguro na mundo no por proteha bo contra diabel y su compinche.
Tur compania di seguro ta wordo activa despues cu e hecho tuma lugar, esey ta nifica cu nan ta duna cobertura di daño y perhuicio.
Pero locual Dios ta ofrece na nos ta proteccion contra maldad, kiermen cu Dios su presencia den nos bida lo preveni maldad di bini den nos direccion.
Y Dios ta splika bon cla cu mil por cay banda di bo, y dies mil na bo man drechi, ma serca bo e lo no yega.( Isaias 54:17 / Salmo 91:7).
A base di e declaracion di bo boca, bo situacion lo cambia, bo cobertuta di proteccion lo aumenta ora bo declara Dios su grandesa riba bo bida.( Salmo 91:2).
Pasobra Dios mes lo kita miedo for di bo, y duna bo paz y seguridad cu e mundo no por ofrece bo.
Dios ta ofrece bo un proteccion cu ta preveni accidente , ni malesa cu ta move den dia, ni esnan cu ta move anochi lo no tin efecto riba bo.( Salmo 91:6).
Awor aki nos ta rondona cu hende cu tin problema di salud mental, cual ta algo serio, pero Dios ta ofrece cura pa salud mental, pasobra tur oracion, alabansa y adoracion den nomber di Cristo Hesus dirigi na Dios ta un avance pa liberacion di depresion.(Mateo 18:19).
Den Cristo Hesus tin cura pa depresion, pasobra pa Dios nada ta imposibel, tur locual Dios ta ofrece ta gratis. Cerca Dios e preis di cuido di bo salud no ta aumenta. Fe ta move man di Dios.
Nos kier ofrece bo lo siguiente y e resultado ta pa Gloria di Dios, kende ta mira e entrega di bo curason na dj’E. Haci oracion, lesa e palabra di Dios y mas cu tur cos kere y gradici pa bo sanacion.
Salmo 77,/ Mateo 11:28/ Juan 16:33/ Proverbionan3:5+6/ 1 Pedro 1;5-7/ Salmo 9;9/ Isaias 41;10/ Salmo 34;18/ 2 Corintionan 1:3+4/ Salmo 40/ Salmo 3;3/Josue 1:9/.
Tur esakinan ta palabra di Dios, di forsa, consuelo y sanacion, pasobra depresion ta real, pero bo tin di confesa e problema y aplica e palabra di Dios den bo bida y e alabansa na Dios y Dios su misericordia y compasion lo ta cu bo.
Awor aki mes bo por drenta bao di e sombra di e Altisimo: Si bo confesa cu bo boca cu Hesus Cristo ta Señor y kere den bo curazon cu Dios a lant’E for di mortonan lo bo ta salba.
Sinceramente, Pastor Marcel Balootje.
