Ta tristo ora nos tende hende ta declara cosnan riba bida di otro, cu no ta boluntad di Dios.
Y palabra fuerte ta cay manera:
Bo no ta cambia nunca mas.
Bo no ta sirbi pa nada.
Nunca lo bo stop di droga.
Henter boso famia ta mesun cos.
Hende bobo ta keda hende bobo.
No tin chens pa bo.Bo ta laat na tur holoshi,Bo tempo a pasa.
Tur esakinan ta insinuacion cu hende ta acepta y hopi biaha cana cune den cabes, awel pasobra tal hende a bisa asina, awel asina e cos ta, y especialmente ora esaki wordo pronuncia door di un mayor.
Si bo acepta mentira den bo bida, bo ta keda biba bao di mentira, pasobra e plan di diabel ta pa mantene bo domina.
Den e buki di 1 Cronicanan 4:9 e palabra di Dios ta bisa : Y Jabes tabata mas honorabel cu su ruman hombernan, y su mama a yame Jabes, bisando pasobra ta cu dolor mi a hanje.
Pero den versiculo 10 bijbel ta siña nos cu no ta locual cu hende bisa, esey ta locual mester domina bo bida.
Awor Jabes a invoca e nomber di Señor e Dios di Israel, bisando ,Oh cu Abo lo bendicionami di berdad y haci mi teritorio mas grandi, y cu Bo man lo ta cumi, y cu Abo lo wardami di malo, pa pena no tocami. Y Dios a dune locual cu e a pidi.
E cosnan malo cu hende ta papia bo no por laga nan dirigi bo bida, no laga nan cria reis den bo bida, pero lanta bo bida riba e baranca cu ta Cristo, paso tur sabiduria ta bini di ariba.
Ta pesey awendia bo ta tende di tanto hende cu tin depresion den nan bida y cu nan ta malo bao di terapia y remedi, pasobra nan a permiti palabra di hende goberna nan bida.
Den e buki di Jeremias capitulo 29 :11 Senor ta bisa: Pasobra Mi sa e plannan cu mi tin pa boso,Señor ta declara: plannan pa pas y no pa calamidad, pa duna boso un futuro y un speransa.
Nos mester bisa bo cu e plannan di Dios pa bo bida ta contene boluntad di Dios pa bo bida y no ta contene:
Inmoralidad, orguyo, vengansa, mentira, rabia, amargura, violencia, divorcio, adulterio,impuresa,perversidad, cambio di sexualidad etc.
Señor ta bisa e tin plannan, esey ta nifica cu tin mas cu un plan pa bo bida, pesey Dios su palabra ta bisa cu e husto lo cay siete biaha, pero Señor lo lante.
Tin hopi cos cu hende ta hinca den nan cabes, curazon duro, capricho, cu ta hiba na stress y depresion y bida intrankil cual tin chens di causa malesa , pasobra tin hopi tipo di malesa, cu ta bini den hende su bida, depende na e tipo di bida ( lifestyle) cu nan ta biba.
Inmoralidad den bida di hende ta trece cune , diabetico, presion halto, colesterol,ulcera, dolor di weso etc, pasobra e bida no ta duna trankilidad na e curason, y esey ta pone cu otro organo den e curpa no ta funciona bon.
Como hoben si bo ta cana cu arma , sea pa defende bo curpa of pa spanta hende, esey no ta bini di Dios, e pensamento di bebe tur dia, droga, Ghetto, Tribe, gangster y gang no ta bini di Dios..
Esaki no ta e plan di bida cu Dios tin pa bo, no laga nan gañabo.
Sinceramente, Pastor Marcel Balootje.
