Cada biaha cu nos mira kico hende ta haci cu nan propio bida, nos ta haci un pregunta , e persona aki no ta conciente cuanto Dios ta stime, y con bon Dios kier mire?
E persona aki no ta stima su mes cu e ta purba di tur manera di daña e bida cu Dios a dune?
Un persona cu ta bebe y droga te na un forma cu e mes no por para riba su pia y no ta responsabel pa ningun di su actonan kico e ta desea?
Nos no por tira e falta riba droga y alcohol, pasobra ningun di nan dos, no ta mishi cu bo, si bo no mishi cu nan.
Tampoco tira e falta riba diabel, pasobra si bo ta cu Dios, diabel ta para lew for di bo, y ademas lo bo huy for di cualkier tentacion cu ta bini den bo direccion.
Pakico hende mester purba experiencia cu maldad?
Pakico hende metser purba na destrui nan curpa cual ta tempel di Dios?
Ki benficio tin den corre auto duro, of falta respet y busca violencia?
Ki ganashi tin ora nos ta sali cas bon, y despues nos no sa con nos a yega cas?
Ki beneficio tin den pone nos mayornan den tristesa cu nos comportacion?
Ki beneficio tin den bebe tur dia y falta respet pa famia tur dia?
Na unda a sali e malcriansa y e barbaridad di papia asina tanto palabra malo?.
Na unda sali cu coleganan di trabao por yamabo un nomber sushi y bo ta acepte?
Ki beneficio tin ora polis mester corre bo tras y gara bo y hiba bo bay cera?
Como mucha muher por ta bo a lubida con bunita bo ta?
Como mucha homber por ta bo alubida cu mesun cara cu bo tin awe , lo bo tin mayan.?
Bo ta na altura cuanto Dios stima bo y cu Cristo Hesus a duna su bida pa bo?
Bo ta na altura cu tur e cosnan cu bo ta pensa cu ningun hende sa, Dios si sa tur cos di bo?
Cual ta e gananshi den biba un bida di mentira, actuando manera artista?
Bo a yega di pensa cu bo ta bira grandi y cu e karakter malo ey bo no por avansa den bida?
Y cuanto pregunta mas por wordo haci, pasobra e oloshi di bida ta sigi cana, y hopi hende ta kere cu tempo ta warda riba nan, tempo no ta warda riba ningun hende, pero tur hende ta yega e momento cu nan mester realisa cuanto Dios ta stima nan y entrega nan bida na Dios, pasobra ta esey ta e unico cos cu futuro tin den dje, pasobra un bida sin Cristo, sin tin un relacion berdadero cu bo Salbador ta un bida bashi y na final lo resulta un bida perdi..
No laga ningun hende gañabo e , no tin ningun beneficio den maldad y tur locual hende sembra nan ta cosecha, tene cuenta cu malesa, y dificultad di bida, ta cana jaag riba hende desobediente na e palabra di Dios.
Y hopi hoben no kier compronde con nan por tin malesa, y preocupacion for di un edad hopi jong, esey ta bini door di desobedencia na e palabra di Dios.
Si bo tabata sa cuanto Dios ta stimabo, y Dios ta desea tur cos bon pa bo, awe mes lo bo entrega bo bida na Cristo Hesus, y acepta Dios su cariño y bondad.
Sinceramente, Pastor Marcel Balootje.
