Un di e prome pasonan cu mester wordo tuma pa elimina depression y evita problema mental ta pa laga Dios goberna bo MENTE , pasobra esun cu ta goberna bo MENTE ta esun cu ta goberna bo bida, y Dios den su palabra a laga e conseho aki pa nos tur.
Filipensenan Capitulo 4 vers 8+9 Apostol Pablo ta scirbi: Finalmente rumannan , tur locual ta berdadero, tur loke ta honorable, tur loke ta husto, tur loke ta puro, tur loke ta bunita , tur loke ta di bon fama, si tin algun virtud, y si tin algo digno di alabansa, laga esakinan ocupa boso mente.
Y e cosnan cu boso a siña, y a ricibi, y a tende y a mira den mi . practica e cosnan aki, y e Dios di paz lo ta cu boso.
Pone bon atencion na esaki : Stop di papia cosnan cu bo no ta desea, stop di papia cosnan negativo,evita pensamentonan cu ta haci dolor, evita pleito, no trece bek den bo bida cosnan cu no ta yudabo cu nada, reprende tur pensamento cu ta bay contra di bo bida , bo cas, y bo famia, den nomber di Cristo Hesus.
E palabra di Dios ta bisa nos cla: pensa riba cosnan cu ta puro, berdadero, cual ta cosnan cu tin bondad, virtud y alabansa na Dios, pasobra e mundo ta yena cu maldad y mal pensamento.
Laga tin den nos e actitud di Cristo Hesus,( Filipensenan 2 vers 5) pa asina nos por vence e flecha nan di e malbado, laga humildad, amor, deseo di haci bon goberna nos curazon.
Tur locual ta orguyo,duele, amargura, rabia , y odio, reprende nan den nomber di Cristo Hesus, pasobra den e cosnan aki no tin Adelanto pa ningun hende.
Y mas cu tur cos pidi Dios cambia bo curazon y siña pordona , pasobra ora bo pordona un persona, abo ta esun di prome cu ta haña bo libertad, pasobra ya bo no ta mara mas na odio y rabia, bo a laga los for di cosnan bieuw y awor bondad ta goberna bo bida.
Tene cuenta cu si tur dia bo lanta ta zundra den bo cas , hunto cu bo yuinan, treciendo acusacion, y desorden, bo paz lo wordo kita y henter e paz di bo famia lo wordo kita, y diabel lo cohe ventaha, pasobra ta esey e kier logra pa dividi e famia.
Pero pesey nos tey cu e Palabra di Dios, pa evita pa bo drenta den un situacion, cu por causa lamento, caminda abo bo mes no sa e salida.
Tur locual ta berdad ta cura hende, pero locual ta mentira ta herida hende, tur locual ta impuresa, ta rebaha e balor di e creacion di Dios, aunke e ta mustra normal awor den comunidad , aunke hopi ta hacie, e ta keda pica den bista di Dios, bo por ricibi apoyo di amigo y esnan cu no tin temor di Dios, pero dilanti di Dios e ta keda impuresa , un pica di cual hende mester arepenti y aparta di dje .
Nos ta bibando den un tempo cu nos tur mester cuida, no solamente di pandemia, pasobra e por haci nos malo of simplemente bisa mata nos.
Pero nos mester cuida di mal influencia, cual ta ataca nos mente y hopi biaha ta hiba hende na depression.
Conseho ta pa nos haci mas oracion posibel, y laga nos mente wordo goberna pa Dios.
Sinceramente
Pastor Marcel Balootje.
