Hopi biaha expresion di un persona por pone bo  pensa cu no tin salbacion pa e otro, hopi biaha mirando circumstancia nos ta perde speransa, hopi biaha mirando avance di enfermedad, nos ta cuminsa prepara  pa morto, y tambe riba experiencia di otro hende nos ta declara cu mesun cos lo sosode cu nos . 

Pero no ta asina, Dios tin poder pa cambia TUR  situacion, pasobra dilanti di Dios hende ta prohimo di otro y no adversario. ( 1 Pedro 5 vers 8-10 ta splica nos ken ta nos berdadero adversario).

E historia di Lazaro ta un historia hopi grandi caminda Hesus a lanta un homber for di morto cu tabata hole caba, asina su propio ruman a declara.( Juan Capitulo 11 vers 38-44).

Nunca un hende por ta den un situacion asina dificil cu Dios no por yude, hopi hende ta papia, pero como mayor bo tin di siña bo yiunan pa kere den Dios, tur momento y no entrega, pasobra si  nos biba pa Cristo nos lo muri den  Cristo y lanta bek cu Cristo na e momento di Su binida.

No tin hende asina malo cu E  no por cambia, no tin situacion dificil pa nos Dios, Dios ta bisa den e buki di Jeremias Capitulo 32 vers 27 : Mira Ami ta Señor , e Dios riba tur carni acaso tin algo cu ta mucho dificil pa Mi.( Mateo 19:26 + Zacharias 8:6)

Laga nos siña  nos yuinan  pa nan no biba for di expresion di boca di hende, pero for di cada palabra cu ta sali for di boca di Dios.

Hopi biaha den un caso na lugar  di nos haci oracion nos ta expresa duda, y no ta pone cosnan den man di Dios, nos ta expresa derota , caminda nos tin un Dios Todo Poderoso.

Palabra nan manera : E mucha ey nunca mas ta cambia, E a sali su tata, of su mama no tabata miho,E no ta mi yiu, no ta bon .

Ora nos tin Fe den Dios nos ta expresa diferente, sea e mucha ta nos yiu of e yiu di otro hende, pasobra Dios a bisa stima Dios riba tur cos y bo prohimo manera bo mes, kier men  for di nos boca den ningun circumstancia nos por sali expresion negativo contra otro pasobra Dios por cambia tur asunto.

Saulo di Tarzo den su ignorancia tabata persigidor di Cristian despues di su encuentro cu Hesus Cristo, su bida a cambia, y awe e ta ehempel pa nos tur   , con un hende su bida bida por cambia, despues di tabata un matado, persiguidor di hende.

Como mayor nos mester busca direccion di Dios pa locual ta concerni nos yuinan, pasobra nos palabra nan tin poder y si nos no entrega, nos lo mira e Victoria.

Pa Dios nada ta imposibel, y tur cos ta posibel pa esnan cu ta kere.

Nos ta mira cada dia con maldad ta avansa, prome cu un caso caba,  ya un otro ta lanta, ta parce manera hende ta actua completamente for di conocemento, pasobra bo ta puntra bo mes ta na unda nos ta bay, tin un aumento di scuridad hopi grandi, pero hunto cu tur esaki e Luz di Señor ta briya hopi fuerte, den fe y speransa , pasobra sin Fe ta imposibel agrada Dios.

Si Hesus Cristo por a lanta Lazaro for di morto, anto speransa no por caba pa esnan cu ta kere.

Sinceramente

Pastor Marcel Balootje.

LEAVE A REPLY

Please enter your comment!
Please enter your name here