Esaki ta cosnan cu ora nos tende y lesa di nan, nos mester haci hopi oracion, pasobra e asunto aki ta aumenta dia pa dia, y enbes di pone un paro, arepenti, biba drechi, mayor kier busca tur sorto di terapia pa e yiu y no ta tene cuenta cu e mes ta causante di e depresion di su propio yiu.

Un mayor ta bisa “Mi yiu ta mi preto di wowo”, pero en cambio e yiu ta bisa” Mi stima mi mama y mi tata, y un yiu semper ta cla pa defende su mayornan, y e no ta permiti ningun hende papia algo robes di su mayornan, asina cu e tende algo, e ta yega cas y e ta bisa, y ora no tin un contesta decente, favorable, y husto pa e mucha ,eynan tur e dolor ta cuminsa.

Tin hopi cos cu mayor mester pone como prioridad di bida:

Un mucha mester lanta cu e palabra di Dios den su bida;

Pasobra esey ta locual Dios ta demanda den Efesios 6:4 / Colosensenan 3:20+21, pero nos tur ta mira kico ta pasa cu e muchanan cu no tin displina spiritual den nan bida. 

Nan ta cay facilmente den gara y mentira di diabel.

Y esaki ta falta di nan mayornan.(Proverbionan 22:6)

Ta deber di tur mayor pa instrui e mucha den caminda di Dios, y e mayor no por culpa ningun hende di esey. Cuminda y paña bunita so no ta suficiente .(Mateo 19:14)

Door di negligencia di mayor e mucha ta lanta sin respet pa Dios.

E mentalidad di hunga grandi:

Hopi biaha bo ta haya mayor ta sconde tras di nan yiu pa laga nan orguyo prevalece, y bisa cu nan ta haci tur cos pa nan yiunan, caba ta pa nan propio Ego. 

Pasobra ningun yiu no por pone presion riba su mayor pa cosnan di marca etc, pasobra un mucha mester wordo lanta na alcanse di su mayornan.

Sino e propio mayornan cu nan idea di grandesa ta pone e mucha trompica, pasobra door di e mal custumber ey, ora su mayornan no por, e mucha ta bay busca cos pa su propio cuenta, cu tur consecuencia cu esey por trece cune.( 3 Juan 1:4).

E mucha laga pa su cuenta:

Ta bon pa bay gym, ta bon pa bay curso pa crece den trabao, ta bon pa keda reunion di trabao especialmente ora e ta na bienestar di comunidad completo, pero esaki no por bay a costo di nos yuinan.

Nos no por permiti un mucha haci locual cu e kier, pa asina nos tambe haña chens di haci locual cu nos kier. ( Proverbionan 29:17)

Un telefon moderno no por reemplasa presencia di mayor, manda un app di saludos no por compara cu e amor cu bo mester dune.

E famoso wega di Divorcio, mayor cu byside.

Con un mucha ta sinti su mes ora e tende su mama/tata ta insulta otro di e forma di mas baho cu por tin?

Con un mucha ta sinti su mes ora e mira con su mama/tata ta bringa cu otro?

Con un mucha ta sinti su mes ora e tin di bandona e cas caminda e ta biba pasobra su mayor a gañe?

Con un mucha ta sinti su mes ora e hanja sa cu su mama/tata ta infiel na otro? 

Tur esaki ta locual ta decepciona un mucha.( Colosensenan 3:21)

Ora nos tende y mira e cosnan aki , ta tempo pa nos dobla rudia y pidi Dios tene misericordia.

Sinceramente, Pastor Marcel Balootje.

LEAVE A REPLY

Please enter your comment!
Please enter your name here