Urgente, den un mundo yena cu mal influencia, caminda temor di Dios, y respet pa hende , cada dia ta wordo poni un banda, ta tempo pa nos samina nos mes, pa nos tene cuenta pa nos ta pega serca Dios y no cay den e zwaai di mundo, caminda tur cos por, pa na final nos no keda decepciona.

Ta berdad cu tin un nubia scur ta cologa, un nubia di malicia, inmoralidad,paranda, adulterio, fornicacion, blasfemia, bruheria, scuridad extremo, memtira y tur otro tipo di bagamunderia cu ta muchu pa menciona.
Anto Dios den Su inmenso amor kier pa nos samina nos mes, y no perde bo tempo bisa no husga mi pero samina bo mes y wak si bo bida, bo actitud ta den boluntad di Dios.

Samina boso mes, pa wak si boso ta den e Fe, samina boso mes,cu Hesus Cristo ta den boso,a menos cu di berdad boso a wordo desaproba. ( 2 Corintiona 13:5).
Ta tempo pa nos samina nos mes y wak si Cristo Hesus ta biba den nos di berdad, of nos tin Cristo pafo di nos bida.

Laga nos samina y investiga nos camindanan y laga nos bolbe serca Señor ( Lamentacionnan 3:40).

Si Mi pueblo cu a wardo yama na Mi nomber, humiya nan mes y haci oracion y busca Mi cara y bira for di nan mal camindanan, e ora ey lo Mi tende for di cielo y lo pordona nan pica y cura nan tera.( 2 Cronicanan 7:14).

Scrudiñami O Dios, y conoce mi curason, purbami y conce mi pensamentonan .
Y mira si tin cualkier caminda di maldad den mi y guiami riba e caminda eterno.( Salmo 139:23+24).

Laga e malbado bandona su caminda,y e hende husto su pensamentonan, y lage bolbe serca nos Señor y E lo tin compasion cun’E, y serca nos Dios pasobra E lo pordona abundantemente. ( Isaias 55:7).

O boso no sa cu e inhustonan lo no hereda e reino di Dios? No laga nan gaña boso,ni fornicado, ni adorado di Dios falso,ni adultero,ni esnan afemina,ni homosexual, ni ladron,ni esnan golos pa placa, ni burache,ni blasfemado, ni estafado,lo no hereda e reino di Dios.( 1 Corintionan 6:9),

Pasobra si un hende pensa cu e ta algo, siendo cu e no ta nada,e ta gaña su mes. Ma laga cada un samina su mes obra,y e ora ey lo e tin motibo pa gaba solamente encuanto su mes y no encuanto un otro.( Galationan 6:4).

No gaña boso mes ,Dios no ta laga haci bofon di dj’E pasobra locual un hende sembra esaki tambe lo e cosecha.( Galationan 6:7)

Ta tempo pa wak bon, pasobra hopi biaha, nos por coopera of consenti cu maldad sin nos sa.
E enemigo tin hopi triki y hopi forma di tentacion pa tumba hende , pesey nos mester ta sobrio y alerta, pasobra nos adversario, ta busca ken e por herida of hasta destrui.

Nan ta profesa cu nan conoce Dios, pero cu nan hechonan nan ta nenga Dios,pasobra nan ta abominabel y desobediente,y nan no ta sirbi pa nada bon.( Tito 1:16).
No laga hende gaña boso: Mal compania ta daña bon custumber. Husa boso sano huicio manera mester ta, y stop di haci pica: pasobra algun no tin conocemento di Dios.Mi ta bisa esaki pa brongosa boso.( 1 Corintiona 15:33).

No ta tempo pa wak rond y compara nos mes cu otro hende, ta tempo pa arepenti y busca Cristo Hesus pa nos bida.

Sinceramente, Pastor Marcel Balootje.

.

LEAVE A REPLY

Please enter your comment!
Please enter your name here