Pasobra nos lucha, no ta contra contra carni y sanger, sino contra e gobernantenan, contra e podernan, contra e forsanan mundial di e scuridad aki,contra e forsanan spiritual di maldad den e lugarnan celestial ( Efesionan 6:12).
Esaki ta e mensahe cu nos a tende di dj’E y ta anuncia na boso , cu Dios ta lus y den dje no tin nada,nada di scuridad.( 1 Juan 1:5).
Esaki t e condenacion cu e luz a bini den mundo,y hende tabata stima e scuridad mas cu e luz pasobra nan hechonan tabata malo.Pasobra esun cu ta haci maldad ta odia e luz, y no ta bini na e luz pa su hechonan no wordo exponi.( Juan 3:19-20
Cuanto mas nos mester splika nos hubentud tocante di luz y scuridad, cuanto mas bida mester bay perdi, cuanto accidente mas mester sosode, cuanto mayor mas mester yora perdida di nan yiu prome cu hobennan por scucha.
Hobennan un cos nos por bisa boso cu diabel ta real, y cu diabel ta cana rond buscando ken e por destrui, y den cada hende desobediente na Dios, e ta traha un estadia den nan mente caminda pa asina e autorisa maldad.( Juan 10:10 -Santiago 4:7).
Especialmente den e luna aki cu tin celebracion di e fiesta di Halloween, algo cu nan ta bisa ta wega, pero cu tin un profundidad satanico, algo cu a bira un negoshi, pero den dje tin un daño mental y spiritual pa hopi hende.
Locual abo ta mira como un wega ta cuminda pa diabel, pasobra hopi ta anuncia fiesta publicamente, pero que hubo di e fiestanan cu ta tuma lugar scondi, esnan di grupito, cu kier experimenta.
Mayornan por fabor no coopera cu maldad, no permiti ningun fiesta di scuridad tuma lugar na bo cas. Y hasta hotelnan mester tene cuenta, pasobra nos ta un isla turistico, pa no permiti bagamunderia satanico tuma lugar den cambernan.
Hesus a bisa lo siguiente: Pa habri nan wowo, pa nan bira for di scuridad pa luz y for di dominio di satanas na Dios, pa nan ricibi pordon di pica,y un herencia entre esnan cu a wordo santifica pa medio di fe den Mi.( Hechonan 26:18)
E uzo di alcohol y droga, e corremento burachi causa accidente, e canamento cu arma, e violencia, e tiramento, e inmoralidad sexual tur ta obranan di scuridad.
E asunto di genero cu operacion pa cambio di sexo di hoben , tur e cosnan cu ta drentando tur caminda rond mundo y cu nos ta roga na Dios pa nan no yega aki banda, ta hechonan di scuridad.
Pasobra scuridad semper ta bay contra e berdad, boluntad, y principionan di Dios.
Nos mester tene cuenta cu ley por wordo cambia of kibra, pero principionan estableci pa Dios ningun hende por cambia nan.
Anochi ta serca di pasa, y dia ta serca di habri, pesey laga nos pone obranan di scuridad un banda, y bisti e armadura di luz ( Romanonan 13:12)
Corda bon cu luz y scuridad no tin comunion cu otro.
Mayor cada biaha cu abo permiti bo yuinan ta haci cosnan for di regla, abo mes ta fia auto na un menor di edad, sin rijbewijs pa asina e sali cu su amigonan y corre cu Icejug den baul yena cu ijs y bebida alcoholico, bo ta habriendo porta di scuridad pa bo propio yiu.
Scuridad kier tapa mundo completo,pero Cristo Hesus ta e luz di mundo, y si nos ta na Su banda, scuridad lo aleha for di nos.(Juan 8:12).
Sinceramente, Pastor Marcel Balootje.
