Recientemente por scucha con Patrick Paskel, vocero di Mike Eman y di AVP ta trahando duro pa asina hustifica y defende ladronicia di tereno.
Esaki ta signal cu Partido AVP no kier siña su les, pero apersa cu nan sa cu nan ta hecha baina cu tereno di pueblo, enbes di pidi disculpa, y purba na pidi pordon, y haci promesa cu nunca mas nan lo bolbe faborece y enrikece nan hendenan, nan ta haci net lo contrario.
Awor e periodistanan avepista ta busca tur sorto di forma pa ‘praat goed’ algo cu ta totalmente robes. Peor ainda, nan kier hustifica nan maldad, indicando cu otro tambe a haci’e. Pues, pasobra supuestamente otro a haci’e, nan tambe tabatin mag di haci mescos.
Loke a sosode den Gobierno di Mike Eman, ta nada otro cu hortamento di tereno di pueblo ne forma di mas askeroso cu ta existi.
Ex Minister Benny Sevinger tabata faborece tur su amigonan! E tabata pone su firma, pa asina por enrikece su amigonan, cu despues lo mester dunele yudansa, pago of page bek cu ‘sponser’ pa campaña.
Esun cu ta kere cu e por haci AVP un fabor, pa pinta loke a sosode como algo normal, ta hopi robes y ta mas rabia nan duna pueblo. Pasobra ovbiamente por constata cu nan no tin gevoel mas y den nan mundo, tur loke ta malo ta bira bon.
Tin 21 mil pagina di prueba y di investigacion, con por ehempel Leoncista Arends na forma falso a lanta compania, cu e unico obhetivo di bende e compania y enrikece su mes.
Pa awe nan bin bisa cu esaki a sosode tur tempo, kemen cu pasobra cosnan robes por a sosode tur tempo, esey ta haci’e bon ????
Ta tristo pa mira con ‘sin berouw’, sin gevoel y manera hende sin berguenza ta grita pa defende maldad. Es decir, te ainda e partido no a recapsita di nan maldad.
Mas tristo ta cu ta solamente amigonan di Benny a haya multiple tereno. Un famia y un grupo di amigo a keda haya masha hopi tereno mes, siendo cu e pueblo humilde mester keda warda riba un pida tereno pa traha cas. Pasobra Benny tabata mas druk enrikeciendo su amigonan, cu e tabata traha pa pueblo.
Sigui defende maldad abiertamente, mas daño ta keda haci na e partido AVP.
