ORANJESTAD – Dia 30 di Augustus 2021, Corte Superior lo trata e apelacion di caso IBIS, caminda 6 sospechoso, entre nan Paul Croes, lo mester presenta den Corte di Husticia.
Solo di Pueblo por a compronde cu di e 6 sospechosonan, 3 a wordo declara liber. Manera ta conoci, Paul Croes a wordo condena na 4 aña di prison. Ta asina cu Ministerio Publico a apela e sentencia mientras cu Paul Croes, su señora Melony Croes Paesch y señor Wever a apela e sentencia contra nan.
Na Januari 2021 den e “regie zitting”, Paul Croes ta wordo representa pa mr. Sulvaran di Curacao y mr. Illes di Aruba. Di parti di e abogadonan aki a haci un serie di peticionnan por escrito na Hof y Ministerio Publico a haya copia di esakinan pa por reacciona.
Den sala Corte tabata presente abogado mr. Marchena cu a representa señor Di Vecchia, kende a wordo declara liber pero Ministerio Publico a apela. Abogado mr. Lejuez a representa e dama Martinus, kende tambe a wordo declara liber pero Ministerio Publico a apela. Tambe mr. Lejuez a representa señor Wever, kende a haya un multa pero a apela e sentencia. Abogado mr. Oomen a representa e dama Nuñuez kende a wordo declara liber pero Ministerio Publico a apela e sentencia.
Procurador General (PG) a bisa Hof cu e kier reacciona riba e promer peticion di mr. Sulvaran y mr. Illes pa scucha un trahador na KIA. PG a bisa cu e ta rechaza e peticion aki. Na opinion di PG, e no ta haya cu tabatin violacion di derechonan di Paul Croes. Segun PG, tabatin limitacionnan pa Paul Croes den KIA pero e no ta haya cu a viola reglanan di Derecho Humano.
Ta asina cu Hof na Februari 2021, via video conference, a tuma decision riba e peticionnan di abogadonan mr. Sulvaran y mr. Illes. Hof a dicidi cu ta honra practicamente tur e peticionnan di e abogadonan. A dicidi cu ta bay scucha e director di KIA, director di DIMAS y un trahador di KIA. Dia 30 di Augustus 2021 tratamento di caso IBIS den Corte Superior lo tuma lugar.
