Debi na e exito den bishitante cu den su prome siman na The Movies e pelicula local E Bruha, Bruhá a produci, e cinema a dicidi hunto cu productor Desiree Croes pa alarg’e di 10 pa 17 di april. Den su di dos siman e pelicula a cosecha un éxito mas grandi ainda cu tawata inclui 5 sala completamente bendi.
Na nomber di Berea Productions, Desiree Croes y Addonsito Croes ta yama danki na cada amigo y invitado cu a honra nos pelicula cu nan bishita. E bruha, bruha a tuma total 11 luna pa filma y tawata Semi Chahmi esun cu a filma y edit’e.
Cu orguyo y agradecimento e elenco principal cu ta Desiree Croes (Genoveva), Addonsito Croes (Francis), Yvonne Tromp (Dudu), Yolanda Croes (Margarita), Mirtho Tromp (Gabriel), Ruben Croes (chauffeur religioso), Nigel Maduro (Indjan), Eddie Sambo (cliente), Marisol Tromp (cliente) y cu naracion di Erin Croes, ta gradici un y tur cu a bay wak e pelicula aki.
E pelicula local aki a resulta 100% esun cu mas publico local a trek e ultimo 10 aña. E no ta un mundo facil pa Arubianonan sali y bin wak un pelicula, sigur no uno local, pero orguyo e pelicula E Bruha, Bruha si a logra trek basta hende local y esaki a inclui cinco sala VIP yen.
E comentarionan di esnan presente despues di e pelicula y riba social media a laga e productor y actornan sinti aprecia. E aplauso den e salanan na final tambe a demostra con hopi e bishitantenan a disfruta di dje.
E Bruha, Bruha ta filmacion di e cuenta cortico di mesun titulo, saca for di e buki di cuentanan cortico NO MAS fo’i 2016 di Desiree Croes.
