Gabinete AVP-Futuro ta tuma paso pa restaura poder di compra pa nos grandinan
Oranjestad, 30 di mei 2025 – Gabinete AVP-Futuro, bao liderato di Prome Minister mr. Mike Eman, ta contento pa por confirma cu fin di e luna aki, e pensionadonan a bolbe ricibi e 250 florin den nan reparatietoeslag. E aumento aki, cu a bin na vigor entrante 30 di april 2025, lo continua di manera structura cada luna como un parti fiho di nan pensioen di AOV.
Prome Minister Eman a expresa su gratitud pa e cantidad di reaccion positivo for di e grupo grandi di esnan cu tin derecho riba e pensioen di AOV.
“Nos adultonan mayor a yuda construi Aruba durante nan bida completo. Nos como pueblo y gobierno tin un obligacion pa trata nan cu dignidad, husto y cu cariño. E aumento aki ta un prome paso pa yuda restaura e poder di compra cu nan a perde durante e ocho añanan tras di lomba.”
E aumento di e reparatietoeslag ta un di e promesanan concreto di Gabinete AVP-Futuro y ta contribui pa mehora e bida diario di miles di pensionado.
Mirando pa dilanti: mas sosten financiero den 2026 y reduccion di e prima di AZV
Minister-President a anuncia cu Gobierno ta trahando riba un ehercicio financiero pa na 2026 por duna un otro aumento significativo di e reparatietoeslag pa AOV’ers cu tin solamente AOV como fuente di ingreso.
Ademas, e gobierno ta den dialogo cu SVB (Banco di Seguro Social) y AZV (Seguro General di Gasto Medico) pa baha e prima di 5% pa e pensionadonan. Pensionadonan sin dunado di trabao ta pagando e prima aki nan mes, loke ta representa un peso grandi pa nan.
Gobierno ta analisando si ta posibel pa elimina e prima aki completamente of reduci esaki considerablemente pa e pensionadonan cu un entrada anual bao di 30.000 florin.
“Un sociedad husto su progreso no ta ser midi solamente riba cifranan economico, sino mas bien riba manera cu e ta trata su adultonan mayor. Nan merece trankilidad, respet y siguridad financiero,” segun Prome Minister Eman.
