Hesus pa medio di su morto na crus a saca nos for di scuridad y a trece nos den Su lus.
Cana den e lus di Hesus ta nifica cana den boluntad di Dios.
Esun cu ta cana den boluntad di Dios, no tin miedo di nada, ni tampoco tin berguensa di nada, tampoco ningun hende por reclame nada , pasobra e ta cana den boluntad di Dios.
Esun cu ta cana den boluntad di Dios, ta cana den temor di temor di Dios, y no ta haci nada den rebeldia pero e ta reconoce Dios den tur su hechonan.
E tin Dios na prome lugar den Su bida, no solamente pa nomber, pero pasobra e ta kere den Dios, e tin confiansa den Dios, y e ta stima Dios.
Tempo a cambia, hopi hende ta kere cu Dios, ta Dios den tempo di necesidad, den tempo di malesa solamente, hopi no ta compronde cu Dios, ta Dios di tur dia, y cu Dios no ta cambia, e ta keda Dios tur momento pa nos.
Hopi hende ta laga palabra di otro hende kita nan for di caminda di Dios, pasobra nan ta wak mas pa complace otro hende , cu nan por biba pa Dios.
Si bo tin un hende den bo bida, cu ta aleha bo for di caminda di Dios, sea e por ta bo esposo of esposa, bo mama of bo ta tata, bo ruman muher of ruman homber, bo hefe di trabao, of bo mihor amigo of amiga, tene cuenta cu bo no por bay nan tras, pasobra ningun di nan no a salba bo.
Tur amistad cu hende ta terenal, pero salbacion y bida eterna ta solamente den Cristo Hesus.
Si ta den scuridad mi tin cu gana mi pan di cada dia anto e ora ey mi tin cu pidi Dios dunami un otro entrada, pasobra mi por falta tur cos menos e presencia di Dios, y nos tur sa cu caminda e presencia di Dios no ta , eynan e presencia di diabel ta.
Cada bes cu nos mester bay den scuridad, pa gosa, of pa bisa manera hende ta bisa awendia, pa nan gosa di nan bida, nos tin cu corda cu nos bida no ta di nos, cu nos curpa ta e tempel di Dios y e Spirito di Dios ta biba den nos.( 1 Corintionan 6:19-20).
Si un hende no tin respet pa Dios, anto e hende ey ta busca problema cu Dios:
Dios ta bisa honra bo tata y bo mama, pa bay bo bon , y pa bo tin bida largo riba e mundo aki, asina cu un hende ta desvia di esey e tin problema cu Dios.
Dios a bisa trata bo esposa bon, pa bo oracion por wordo scucha.
Tin un cos cu mester wordo bisa: Ora cu mayornan ta den rebeldia yuinan ta core peliger.
Dios ta bisa cu e ta odia, orguyo y rebeldia, redo , ken cu ta horea duro y no kier tende, lo tin cu atende cu e consecuencia.
No tapa solo cu un dede, cana den e lus di Hesus.
E ora ey Hesus a bolbe papia cu nan bisando: Ami ta e lus di mundo, esun cu sigi Mi, no ta cana den scuridad, ma tin e lus di bida.( Juan 8 :12).
Cana den mentira ta nifica cana den scuridad, cana den inmoralidad, ta nifica cana den scuridad, cana den idolatria ta nifica cana den scuridad.
No cana den sombra di otro hende, pa complace hende, pero cana den e lus di Hesus cu ta hiba na bida eterna.
Sinceramente ,Pastor Marcel Balootje
