Pa Dios nada ta imposible ,
Dios ta fiel,
Dios ta yega na ora,
Dios no ta lubida,
Dios a priminti cu nunca E lo bandona nos, ni tampoco desampara nos.
Dios ta nos refugio y nos fortaleza.
Ora hende bandona nos, Dios semper tey, pasobra e ta Dios, y E no ta cambia, nos ta aleha for di su caminda, y E como nos Dios, semper ta keda warda riba nos.Dios nunca ta sera porta pa su yiunan.
Yerba ta seca, flor ta marchita, ma e palabra di nos Dios, ta permanece pa semper.
( Isaias 40:8).
No tin un lugar scur den nos bida, for di cual Dios no por saca nos, no tin relacion cu Dios no por drecha, si esnan cu tin diferencia di opinion kier drecha nan relacion.
Hopi biaha nos ta mira hende ta pasa den un scual di bida, nan tin mester di yudansa, Dios tey cla pa yuda, pero e duresa di curason, ta pone cu nan ta keda den nan situacion, pasobra e hende mes no kier, reacciona riba e cambio cu Dios ta ofrece.
Ta duele pa ,mira con un famia bunita, poco poco ta habri for di otro, ta duele pa mira con mayor ta neglisha educacion di nan yiu, ta tristo pa mira con hende no ta balora nan matrimonio y nan famia, pero si un hende kier drecha su bida, Dios tey tur momento pa esnan cu kier arepenti, pidi pordon, y drecha cos den bista di Dios.
Un problema grandi cu nos tur ta enfrenta , ta cu nos ta preocupa demasiado kico hende lo bisa, enbes di wak con nos ta para dilanti di Dios,nos kier keda bon cu hende, nos kier demostra hombresa, of palo di muher dilanti nos amistadnan, pero dilanti di Dios nos no por hisa cara, pasobra nos sa cu nos relacion cu Dios mester wordo drecha.
Si bo auto danja , bo ta hibe garashi pa e wordo drecha y pa bo sigi corre bo auto, awor dicon ora relacion matrimonial no ta bon, hende ta opta pa divorcio, y lubida tur e bondadnan di tur tempo, lubida e yuinan, y e esfuerso cu a haci hunto pa yega na un hogar.
No ta por nada e palabra di Dios ta bisa den Mateo 26:41 : Keda vigila y haci oracion, pa boso no cay den tentacion, e spirito ta boluntario, ma e carni ta debil. Ta pesey nos mester permanece fiel na Dios.
Hopi biaha como mayor ta tarda pa coregi nos propio yiu, nos ta malcria e mucha, nos ta lage haci manera e kier, creciendo sin regla, sin respet, e ta bira bandido, y despues cu nos mes boca, nos ta descualifica nos yiu, bisando cu e no ta sirbi pa nada,pero e pregunta ta bini, ta ken a laga cos bay for di man?
Ora nos ta fiel na Dios, Dios ta mantene nos wowo habri, pa nos cuida locual ta di Dios, pasobra no lubida cu yuinan ta herencia di Senjor y e fruta di barica ta un recompensa,( Salmo 127:3)ta pesey nos no por lanta nos yuinan sin Dios.
Hesus a keda wak nan y a bisa nan,serca hende esaki ta imposibel, ma serca Dios, tur cos ta posibel ( Mateo 19:26) pesey nos mester keda perservera den oracion, pa nos famia, nos no mester entrega, pasobra Dios ta scucha y contesta oracion, y pa Dios nada ta imposibel.
Laga nos permanece fiel na Senjor, tur ora bay, pasobra solamente den Senjor nos tin un baranca fuerte.
Dios tey pa nos tur momento.
Sinceramente, Pastor Marcel Balootje
