Mientras cu e trayecto pa regularisa e situacion di miles di persona indocumenta na Aruba ta andando, un problema serio a presenta den practica cu ta pone e proceso aki den duda.
E 5.000 personanan indocumentado cu a haya permiso pa un aña, ta enbusca pa legalisa nan permiso pa nan por keda na nos isla, un di e rekesitonan fundamental ta pa tin un patron (empleador) cu ta dispuesto pa firma pa nan y asumi e responsabilidad legal y financiero. Sinembargo, un gran cantidad di compania no ta den posicion pa por haci esaki.
Debe na Belasting y Exigencianan Stricto
E motibo principal pa e situacion aki ta cu hopi di e empresanan cu lo kier a tuma e trahadonan aki ta enfrenta debenan pendiente na Departamento di Impuesto. Den e checklist y condicionnan pa por actua como patron oficial, e compania mester ta completamente “tax compliant” (al dia cu nan pagamentonan di impuesto y seguro social) y presenta tur e documentacionnan rekeri intacto.
Aparte di e debenan cu Belastingdienst, e exigenianan di documentacion y papelnan legal ta resulta di ta un barera halto y complica pa hopi negoshi local cu actualmente ta pasando den situacionnan financiero dificil. Como consecuencia, miles di indocumentado ta keda sin e firma crucial di un patron, creando un status nobo den e proceso di regularisacion.
Futuro Incierto pa e Plan Politico
E situacion aki ta hiba na e pregunta inevitabel: Kico lo pasa awor cu e plan y “briyante idea” aki proponi pa Arthur Dowers, AVP y e partido Futuro?
E iniciativa aki, cu a wordo presenta como un solucion pa e problema di personal y e situacion di indocumentadonan na Aruba, awor ta topa cu e realidad di e sector comercial local. Ya cu hopi compania no por cumpli cu e reglanan di Belasting y e exigenianan di documentacion, e pregunta ta keda si e partidonan politico envolvi lo bin cu un ahuste den e reglanan of si e proyecto aki lo keda pega den e burocracia actual.
