Den colaboracion cu RAA! Residencia Artistico Aruba, ta invita e publico pa un Artist Talk special como parte di e clausura di e exhibicion di Perspectivanan Invisibel, un programa di fotografia inclusivo pa hende ciego of cu limitacion visual.
E evento lo tuma luga riba diasabra 21 di maart, for di 4:00 te 6:00 p.m. na RAA! Residencia Artistico Aruba.
Durante e Artist Talk, algun di e participantenan di e programa, hunto cu artista y instructor Rafael Barragán, lo comparti nan experiencia, proceso creativo y reflexionnan riba con nan a explora fotografia manera medio di expresion personal. E conversacion lo wordo modera pa Ana Maria Hernandez (fundado di Plataforma Aruba y Director di RAA!), creando un espacio pa dialogo, intercambio y conexion cu e publico.
Perspectivanan Invisibel, desaroya den colaboracion cu FAVI Aruba, ta enfoca riba habri espacionan creativo pa hende cu limitacion visual, uzando metodo sensorial basa riba sonido, tacto y experiencia pa explora fotografia.
E exhibicion na RAA ta presenta e resultado di e trabou crea durante e prome modulo di e programa, y e Artist Talk ta marca un momento di celebracion y reflexion riba e proceso di e iniciativa.
Entrada ta gratis y habri pa tur hende.
Informacion di evento
Fecha: 21 di maart
Ora: 4:00 – 6:00 p.m.
Luga: RAA Residencia Artistico Aruba, Caya Betico Croes 110, Oranjestad
Pa mas informacion:
coordinator@plataformaruba.org
+297 742 5366 Stichting Plataforma Aruba ✦ +297 563 1833 ✦ www.plataformaruba.org ✦ KVK S1721.0
