SOLO DI PUEBLO a sigui e desaroyo e siman aki, unda Sindicato di polis a protesta contra contra departamento di recurso humano pa motibo di tardansa den atende y procesa bevordering di como 20 polis.
E situacion di tardansa na DRH no ta algo nobo, pasobra SOLO DI PUEBLO mes a trece esaki dilanti caba. Tambe nos a denuncia cu ora un persona gana su caso, DRH ta mande beroep. Y riba dje ora gana den beroep, asina mes DRH no ta ehecuta e sentencia di huez.
Pues ta parce cu DRH mes kier sinta riba ley. Eynan sigur tin algo pa drecha. E productividad di DRH mester wordo mehora y ora nan perde caso na huez, nan mester ehecuta tambe e decision di huez sin ningun tardansa.
SOLO DI PUEBLO a compronde cu a bin resulta cu for di 20 peticion, tin un total di 6 polis cu nan carta nunca a yega minister ni DRH. Pues, realmente un otro problema, pasobra aki nos ta papia cu ni minister ni DRH sa di nan peticion.
Mesora Minister Rocco Tjon a bisa, cu lo bay mehora e contacto entre polis y DRH, pa asina por duna atencion na e casonan aki y mira con por agilisa e peticionnan. Tin 8 peticion cu ta na gobernador, cla pa wordo firma. Pues esey ta na ordo.
SOLO a tuma nota ta cu Minister Rocco Tjon a reacciona mesora riba e problema aki y mesora a corigi loke mester wordo corigi.
Ta spera cu tur loke polisnan a trece dilanti, nan dolornan, nan reclamo, e asunto di ora cu nan ta malo, etc.etc. tur lo wordo trata y aparoba pa Minister Rocco Tjon pa asina e trabaonan aki por cana smooth.
