ORANJESTAD – Awe mainta Hof di Corte Superior a trata un caso grandi di un grupo, mayoria Venezolano, y un dama, kendenan durante un periodo di 3 luna a haci un serie di asaltonan arma cu violencia na cas di famia. E grupo aki e castigonan tabata entre 4 y 14 aña di prison. Ocho di e grupo 10, sea a apela nan castigo of Fiscal a apela e sentencia. Atardi, henter e grupo a haya un baño di awa friu ora nan a scucha PG exigi pa subi tur e castigonan.
SOLO DI PUEBLO por a compronde cu den sala di Corte por a mira miembronan di CEA, miembronan di unidad special di KIA, presente den sala di Corte durante tratamento di e caso. E mayoria di e acusadonan, tabata cu man y pia geboei. Den sala di Corte ora nan a sinta, e boei di man a wordo kita.
For di mainta, te den oranan di atardi a trata e caso di e hombernan Venezolano: J.D.R., J.C.V.V., su ruman C.V.V., J.P.B., F.M.S., A.D.B., M.G.A. y e dama C.W.
Dia 23 Juni 2021 Hues di Corte den Promer Instancia a dicta sentencia. Hues den su sentencia a condena total e serie di asaltonan arma cu a sosode. Sinembargo tin algun di e casonan caminda Hues no ta haya cu algun di e sospechosonan ta culpable y a declara nan liber.
Hues a condena e homber J.P.B. na 14 aña di prison.
E homber A.D.B. a wordo condena na 12 aña di prison .
E tres hombernan M.G.A., J.C.V.V. y J.D.R. a wordo condena na 10 aña di prison.
E homber C.V.V., kende ta ruman di J.C.V.V., a wordo condena na 8 aña di prison.
E dama C.W. a wordo condena na 5 aña di prison.
E homber F.M.S. a wordo condena na 4 aña di prison.
ASALTO ARMA CU VIOLENCIA
Hof a haci e acusadonan un serie di pregunta y por a mira cu tin algun di e acusadonan ta bisa cu nan ta envolvi den cierto caso y no den otro caso.
Hof a mustra cu hustamente den e periodo di pandemia di Covid, e grupo aki a bay haci e serie di asaltonan arma cu violencia. Diferente di e victimanan di asalto arma a sufri maltrato formal.
Hopi di e acusadonan a bisa cu nan no tabatin manera pa come y a bay haci cosnan cu awor nan ta lamenta.
APELA PA BAHA CASTIGO HALTO
Durante tratamento di e caso, Hof a puntra cada un di e acusadonan, pakico nan a apela e sentencia. E mayoria a bisa cu nan a apela e sentencia pasobra nan ta haya e castigo ta mucho halto. Despues di basta rato di tratamento, un di e miembronan di Hof a remarca cu e por a scucha varios di a acusadonan na comienso di tratamento di e caso, bisa cu nan ta haya e castigo mucho halto. El a bisa si mira kico tur nan a haci, e ta puntra su mes pakico e acusadonan ta bisa cu e castigo ta halto.
Un di e acusadonan a bisa cu den KIA el a bin haya sa cu tin personanan sera cu a haci hopi asalto y nan a haya 6 aña di prison. Tin otro acusado a bisa cu e sa cu nan a haci hopi malo pero ta haya cu nan ta hende y cu nan merece di haya un oportunidad.
PG A EXIGI SUBI CASI TUR CASTIGO
Den oranan di atardi a sigui cu e tratamento, caminda un Procurador General (PG) nobo, un dama Hulandes, a baha pisa riba henter e grupo di acusado. PG a condena total e hecho cu hustamente den e temporada di pandemia di Covid, e grupo aki a bay asalta cu violencia brutal na casnan di famia. PG ta haya cu esaki a causa mas tension den comunidad. PG a bisa Hof cu e ta haya cu mester baha cu man duro riba asaltantenan cu violencia.
Ta asina cu A.D.B. cu a apela su castigo di 12 aña, awor a scucha PG exigi 16 aña di prison. J.P.B. cu a apela su castigo di 14 aña, awor a scucha PG exigi 16 aña di prison. M.G.A., J.C.V.V. y J.D.R. kendenan a apela nan castigo di 10 aña, awor a scucha PG exigi 14 aña di prison. E dama C.W. cu a apela su castigo di 5 aña di prison, a scucha PG exigi 11 aña di prison. C.V.V. cu a apela su castigo 8 aña di prison, a scucha PG exigi 10 aña di prison. F.M.S. cu a apela su castigo di 4 aña di prison, a scucha PG exigi 5 aña di prison.
Despues di a scucha defensa di e abogadonan, Hof a sera tratamento di e caso y dentro di algun siman lo por spera sentencia.
