Parlamentario Marco Berlis (MEP):
Planificacion, cuido y amor pa nos mascotanan ta esencial
Mi a tuma nota recientemente cu un persona a pone un potret riba facebook di un set di puppies, cu nan a laga bandi caminda den un haula. Un bista masha tristo y lamentabel. E ta mustra cu como comunidad nos tin hopi di siña ainda. E suceso aki no ta uno isola; e sa pasa masha hopi mes cu hende ta bandona pushi y cacho na diferente parti di nos isla pa un of otro motibo. Den mi opinion, ora bo busca un mascota bo mester ta prepara pe den tur sentido. Den tur sentido un mascota ta un miembro di famia nobo. Planificacion y compromiso cu nos mascotanan ta masha importante pa sigura e bienestar di nos mascotanan y pa nos cumpli cu ley.
Un Lugar y alimentacion adecua pa nos mascotanan
Planificacion prome cu nos ta adkeri un mascota ta hopi importante. Si e ta un cacho, nos
mester tin un cas di cacho pa e por drumi aden, su baki awa y pa cuminda, y su area unda e
por cana den cura. Mester percura tambe cu e no por sali foi cura pa asina e no crea disturbio
den vecindad. Un mascota ta un compromiso serio y mester tambe zorg pa e cacho wordo
baña regularmente y pa e haya su atencion. Si nos scoge pa tin un mascota nos mester realisa
cu esaki tambe tin su gastonan cu ne y mester planifica esaki bon den nos presupuesto. Pesey,
un bon planificacion financiero ta un obligacion prome cu nos dicidi di bay adopta un
mascota.
Sterilisa bo cacho of pushi
Den caso cu no ta desea pa tin mas cacho of pushi, ta bon pa steriles’e. Esaki ta un gasto
masha chikito mes compara cu si e mascota mester sali na estado y haya yen pushi of cacho.
Un cita na cualkier veterinario ta soluciona esaki rapidamente. Sterilisando nos mascota
tambe ta asegura cu e populacion di cacho y pushi riba caya ta keda conteni. E ta demostra
tambe cu nos tin un compromiso cu nos mascota y cu nos ta dedica pa dune su atencion, amor
y cuido cu e merece. Ademas di esaki, sterilisa bo mascota tin beneficio pa su salud!
No tuma un mascota si bo no ta bay cuide
Tin varios incidente den cual nos por a wak cu e mascota ta desnutri, descuida y priva di su
necesidadnan mas basico. Un mascota cu no ta ricibi amor ni atencion pronto lo bira malo, lo
sufri y no lo tin un bida largo. Nos mester ta consciente cu e animal tin sentimiento, emocion
y un curason manera cada un di nos. Duna cariño y amor ta esencial pa e bienestar di e
mascota. Hunto nos por haci e diferencia y contribui na un comunidad cu ta balora y eleva e
existencia y derechonan di nos animalitonan. Hunto nos por haci e diferencia y evita otro
incidentenan manera esun di Khaleesi.
Si pueblo desea mas informacion di e articulo aki, contact mi na tel: 528-4639 of email mi na:
marco.berlis@parlamento.aw / Bo parlamentario y sirbidor di pueblo na bo ordo semper!
