12 di Juli 2025 – Oranjestad, Aruba
Mientras cu Gobierno y un grupo di organisacionnan a lansa cu gran show e Programa di Reforestacion di Aruba, un plan pa planta 100.000 mata rond di nos isla, hopi ciudadano ta keda cu preguntanan serio: Ken ta gana? Ken ta paga? Y ken lo cuida esaki?
Segun e anuncio oficial, e meta ta pa planta cien mil mata den cooperacion cu NGO’s, sector priva y scolnan. Bon intencion, pero e pueblo ta pidi claridad. Un mata awe ta costa un promedio di 35 florin. Un calculacion ta bisa cu e por costa 3.5 miyon florin. Esaki ta SIN e saco di gordura cu tambe lo wordo usa. Ken ta e “felis bendedor di mata”?
Nos memoria no ta cortico
Pueblo no por lubida e caso di e famoso “Radisson – Pali Coco Gate”, caminda supuestamente 50 miyon dollar a wordo paga pa palonan di coco for di Cuba, mientras cu e prijs real tabata rond di 2 dollar pa un palo den e tempo ey. Ta e mesun tipo di escandalo ta ripiti? Nos mester sa ken ta bende e mata, ken ta importanan, y riba ki prijs. Transparencia ta un deber.
Proyecto ta bon? Den teoria. Pero den realidad?
Nos no tin awa. Aruba ta sufri di secura, y mientras bo ta purba planta 100.000 mata, e pueblo ta puntra:
“Ken lo muha e matanan tur dia?”
Calor? Hamber? Prioridad?
Tur hende ta sinti e calor, si. Pero hopi hende tambe ta sinti e prijs den supermercado cu a subi sin piedad. E pueblo ta sinti cu nan bienestar no ta un prioridad. Mientras nan ta wak proyecto pa planta mata di miyones di florin.
E preguntanan sperando contesta:
Ken a gana e contract pa bende mata? Ta kiko e proceso pa seleccion ta? Ta cuanto e presupuesto real ta? Ta ken cu ta controla esaki? Y finalmente: Ta ken ta gana placa riba e speranza di pueblo?
Aruba ta cla pa un futuro cu 100 mil mata, pero mester tin claridad, y respet pa pueblo.
