Otmar Oduber di Plataforma Pais a reuni cu SvB pa atende diferente topico di interes, entre nan e proposicionnan cu e Plataforma tin pa loke ta nos pensionadonan y posibilidadnan pa futuro.
Otmar ta di onion cu ora ta bisa cu kier bay den cierto direccion, mester tin un back up di informacion y datonan, evitando asina pa haci promesanan den bashi of falso, simplemente pasobra tin un eleccion na caminda.
A papia riba entrada di pensionadonan, e gastonan cu nan tin, unda cu tin cierto grupo mester paga e ‘volle pond’ pa loke ta AZV. Tambe riba e posibilidadnan cu tin pa esnan cu tin un mayor necesidad den e grupo aki, es decir, esnan cu no ta conta cu un di dos pension, pa subi nan entrada, y no cu 30 of 50 Florin manera por a mira recientemente. Esaki mester wordo adapta, e siguiente gobierno mester bay atende den un forma serio e entrada di e pensionadonan aki pa percura pa nan por tin un bida digno segun e costo di bida na Aruba. “No tin un manera pa desvia di dje, esaki mester ta un compromiso y tur hende mester por sa y mira cua politico y partido ta para tras di e compromiso aki”, Oduber a duna di conoce.
E ta añadi cu e aumento di 30 Florin riba e entrada di nos pensionadonan ta un bofta sin berguensa diparti gobierno. Nos pensionadonan no ta bibando un bida digno y ta nos deber y obligacion pa drecha esaki conforme e costo di bida actual. Un pensionado cu ya caba henter su bida a paga belasting no merece wordo maltrata mas cu mas belasting despues cu baha cu pension.
A papia riba e cantidad grandi di hendenan cu ta biba di un AOV so y cu ta inhumano pa haci esaki. Otmar ta considera cu no ta cuestion di un discusion cu si mester aumenta cu 50% of redobla, ta un obilgacion di e proximo gobierno pa atende cu e situacion aki. E ta agrega cu no ta solamente e grupo aki, pero cu tin otro grupo cu ta cobrando menos cu e AOV normal y cu rapportnan cu tin riba mesa actualmente ta mustra cu e grupo grandi aki ta biba den pobresa.
“1 den cada 4 pensionado awe ta biba den pobresa, mientras 14 mil tin un entrada menos di 900 Florin pa luna y esaki ta inaceptabel. No por cera wowo pe y bisa cu no tin placa. Mester soluciona e problema aki di e pensionadonan cu ta pasando den e problema aki y bibando den pobresa!”
Pa por crea un reduccion den prima pa nos pensionadonan y aumenta nan entrada na un forma drastico y necesario, Plataforma Pais ta para pa e introduccion di un reforma fiscal cu lo ta hopi mas eficiente y productivo pa gobierno y unda e ciudadano lo keda cu mas placa den su cartera pa por dicidi con ta gasta esaki segun su prioridad.
Otmar Oduber
Legalisacion di personanan indocumenta na Aruba lo por genera entradanan di 50 miyon Florin
Durante reunion di Plataforma Pais cu SVB a atende un di e topiconan cu e Plataforma aki ta enfocando riba dje, esta e parti di legalisacion di e personanan indocumenta riba nos isla.
Otmar Oduber a expresa cu for di SVB e por a sinti cu nan ta comparti e pensamento aki. Ta trata di aproximadamente 10 mil persona cu ta costando Pais Aruba hopi placa. E ta un tema cu posiblemente hopi hende no kier atende cune, pero cu ta forma un parti integral den mehora e situacion di nos isla. Rapportnan ta ilustra cu ta trata di aproximadamente 50 miyon Florin cu Aruba ta perdiendo.
E personanan aki tin un trabou, famia, vivienda, pasobra nan no ta biba bou palo of bou brug, pero nan no ta contribui cu nos sistema di entre otro AZV y AOV. Si logra legalisa e personanan aki den un forma coordina y bou cierto condicionnan, manera entre otro, inburgering, lo genera un aumento den entradanan cu lo por contribui na mehora e fondonan medico y social, como tambe entradanan di gobierno.
