Diaranson anochi despues di 11’or di anochi a drenta un informe di un problema na un cas na De Vuyst cu lo a bay for di man y un homber a hinca dos dama den e cas. Despues ela huy den un Pickup cora double cabina. E la bayendo direccion pabou.
Mesora tur unidad di polis a cuminsa buskeda pa e pickup y riba caminda principal di Pos Chikito bayendo direccion pabou, polisnan ta bin topa cu e pickup aki y e homber tras di stuur.
Polis a logra para e auto un poco pariba di Rey Hing Supermarket. Enberdad ta trata di un homber cu su paña tabata tur na sanger. Den e auto polis a bin topa cu un cuchiu cu probablemente e lo a usa pa hinca e personanan.
Varios unidad di polis a bay na e sitio, tambe a pidi pa departamente tecnico di polis bin haci mas investigacion.
E homber a keda deteni y transporta cu transportwagen pa warda di polis na San Nicolas. Despues cu recherchenan y departamento tecnico di polis a caba cu nan investigacion. E auto a wordo confisca y hiba cu takelwagen pa warda di polis.
