No ta usual cu un polis ta keda asina hopi cera durante e etapa di investigacion.
Esaki por nifica cu e caso a bira un caso hopi grandi.
Manera ta conoci, tin varios rumor a cirucla rond di e detencion di Vos. Na prome instante tabata tin di haber cu traficacion di hende, unda di un of otro forma tabata yuda o cordina entrada o estadia pa personanan ilegal.
Sinembargo ora di a tene un inval na su cas, a bin haya un centro di operacion y varios radio di polis conecta na laptop di 24 Ora, cu tabata manda signal via internet pa e medio di prensa.
E noticia por a wordo confirma ora cu net e momento ey y e dianan siguiente e portal di noticia a perde nan signal y ya nan no tabata cubri noticia di polis manera pomer.
Segun por bin compronde cu tin un investigacion riguroso andando, cual ta tuma su tempo. Tin laptopnan cu mester wordo investiga pa asina por establece ken te doño.
E hecho cu e polis tin 12 siman cera, ta un indicacion si cu e caso ta grandi, of mihor bisa e casonan a bira mas y ta rekeri mas tempo pa investiganan.
Tambe ta ser bisa cu a haya arma di candela di otro polis na su cas cu ya anteriormente a retira di Cuerpo Policial.
Ministerio Publico mes no ta bisando nada di e caso, pa protega e investigacion.
Sinembargo Solo di Pueblo a compronde si cu algun pakete di investigacion cu a wordo manda Hulanda y Curacao pa wordo investiga, entretanto a yega bek e siman aki. Despues di revisa e resultado di e paketenan, e investigacion lo sigui cana y lo no dura mucho cu lo tin avanse den e caso.
