Dios ta usa esnan cu ta disponibel, esnan cu ta dedica, esnan cu ta busca di Senjor, esnan cu no tin excuus pa sirbi, ni tampoco ta floho pa pone tempo pa haci e proposito di Dios, esnan cu no ta keha,pero cu ta bisa Senjor ata mi aki, manda mi pasobra mi ta cla pa bay haci tur locual ta bo boluntad.
E nota facil, pa haci esey bo mester nenga bo mes, bo mester mengua, pa asina Dios por crece den bo, bo mester mantene bo bista riba Senjor, pa asina bo por bisa manera Pablo a bisa: Ya mi no ta biba mas , mas Cristo ta biba den mi, esey ta nifica cu tur locual bo ta haci ta pa e gloria di Dios.
No ta tempo pa preocupa cu locual hende por bisa, of locual hende ta bisa di bo,pero ta tempo pa dal bay sirbiendo Dios , di henter nos curason, pasobra e dianan ta malo y tin hopi hende cu mester scucha of lesa e palabra di Dios pa asina nan yega na arepentimento, tin hopi cu ta friando, pa motibo di situacion di bida.
Tin hopi hende cu e enemigo ta rancando poniendo nan bao di opression, hungando cu nan salud mental, pero tin hopi hende tambe cu ta haci cherche di Dios , cu no ta hanja ta necesario pa reconoce Dios den nan bida, segun Romanonan 1 :28-32, y nos tur por lesa e consecuencia cu ta para scirbi.
Nos tin haci hopi oracion y intercede pa nos hubentud, pa Dios libra nan for di e candela di maldad y inmoralidad, cual ta busca e hoben pa destrui, pa kibra su futuro, pa aleha e hoben for di e caminda di bondad y hinca e hoben den caya di scuridad completo.
Tambe oracion mester wordo haci pa matrimonio y famia cualnan ta e pilar di sociedad, esnan cu ta carga e pais den respet y educacion, norma y balor, pa asina Dios manda hopi fortalesa, pasobra e enemigo ta ataka matrimonio y famia constantemente.
Dios ta empodera esnan cu ta disponibel pa Su proposito.
Disponibilidad ta traha lugar pa milager, pasobra hende disponibel, ta hende humilde y obediente.
Nos ta sinja perservera ora nos ta disponibel.
Dios ta libra nos for di pica.
Dios ta duna nos speransa,
E ta duna nos libertad.
E ta duna nos motibo pa alaba.
E ta permiti nos ta ehemplo pa otro.
E ta sostene nos den tempo duro.
E ta duna nos sabiduria y comprendemento.
E ta evita nos di cay den trampa di enemigo.
E ta laga nos conoce e karakter di Dios.
E ta duna nos pas.
Tur esaki ta beneficionan di tur esnan cu ta pone Dios na prome lugar y ta pone nan mes disponibel pa haci e trabao di Dios,sin pensa riba nan mes, pero cu dedicacion ta sigi pa dilanti aunke cuanto nan ta wordo persigui, pasobra ta para scirbi cu tur hende cu kier biba un bida santo den Cristo Hesus lo wordo persigui.( 2 Timoteo 3;12).
Nos ta bibando den un tempo duro, trabahoso y dificil, cual ta demostra cada dia con maldad, perversidad, crueldad, inmoralidad, y malicia ta aumenta, un tempo caminda respet pa famia, matrimonio y bida di hende ta perdiendo balor.
Ta pesey awor mas cu nunca ,nos mester pone nos mes disponibel pa sirbi Dios, pa tuma e curashi di ranca hende for di man di diabel, den nomber di Cristo Hesus.
Pero tambe demostra cu e amor di Cristo Hesus, ta biba den nos.
Sinceramente, Pastor Marcel Balootje
