E causa mas grandi di depression , ta falta di Fe y Confiansa den Dios, hende ta depende hopi riba otro hende y tambe hopi  riba  material, ora hende lagabo na caya, y ora material faya, bo ta bira depresivo. Y ora  depression atacabo y bo no haya liberacion, e por yega na afecta bo mentalmente. Bo mester laga los di tur confiansa falso deposita den hende y confia  den Dios (Oseas 4 vers 6).

Algun hende ta pone nan speransa den un capricho, algo cu nan kier forsa pa tuma lugar, aunke nan sa masha bon cu no por , pasobra e cos ey no ta existi,of nan kier pone un gai  di galiña pone webo, of un morocoy haña pluma. 

Tin hende ta biba cu e speransa cu nan mester kibra matrimono di otro pa nan ta feliz, kier men nan ta haci tur locual ta posibel pa dividi un famia, y ora nan no logra nan ta cay den depression.

Hopi hende pa falta di trabao y entrada  ta biba constantemente for di nan forsa financiero,y esey tambe ta causa depression.

Hopi hende ta pone nan confiansa den hende y ora hende faya nan ta bira malo, pero nan tabata sa for di un principio cu e promesa ey no ta realisabel.

Den e buki di Isaias Capitulo 26 vers 3+4 ta bisa asina : Lo Bo warda den pas perfecto , esun cu su pensamento ta permanence den Bo , pasobra e ta confia  den Boo.

Confia den Señor pa semper, pasobra den Dios e Señor nos tin un baranca eterno.

Si bo ta warda riba algo for di un instancia , bo tin  di usa sabiduria, y pidi Dios interveni den bo asunto, y no bay sinta zundra y murmura henter dia riba e persona of e instancia, pasobra asina bo no ta keda cla. No tin bendicion den murmuracion.

Siña confia y spera den Señor pasobra dichosa ta tur esnan cu ta confia den Dje.

Isaias 40:31 ta bisa: Ma esnan cu spera den Señor lo tin forsa renoba , nan lo bula bay ariba cu hala manera aguila,nan lo core sin bira fatiga, nan lo cana sin cansa.

Tur locual bo haci cu speransa den Señor, poniendo su boluntad na prome lugar, lo bo ta exitoso, pasobra bo confiansa ta den Esun cu nunca a faya,

Dios a priminti den su palabra cu nunca e lo laga nos bandona, nunca lo e faya cu nos.

Jeremias 17 vers 7 ta bisa :Bendiciona ta e hende cu ta confia den Señor, y kende su confiansa ta den Señor,

Salmo 9 ver 10 ta bisa: Esnan cu conoce Bo nomber lo pone nan confiansa den bo , pasobra Abo Señor no ta bandona esnan cu ta busca Abo.

Salmo 56 vers 3 ta bisa : Ora mi tin miedo mi ta confia den Bo.

Philipenses 4 vers 19 ta bisa: Mi Dios lo provee tur loke boso tin mester , segun su rikesa den Gloria den Cristo Hesus.

Anima henter bo famia pa confia awor mas cu nunca den Señor y haci locual cu ta bon, y bondad lo ta den bo hogar na tur momento.

Sinceramente

Pastor Marcel Balootje. 

LEAVE A REPLY

Please enter your comment!
Please enter your name here