Aruba conoce literatura na Papiamento for di cuminsamento di siglo 20, tempo cu Frederick (Fechi) Beaujon a skirbi y publica su poema ‘Atardi’ na 1907. Literatura di Aruba a sigui desaroya, sigur den decada di añanan 50, 60 y 70 di siglo pasa, cu hopi autor skirbiendo obra literario na Papiamento, y entretanto por bisa cu Aruba tin un literatura na Papiamento y cu continuamente tin hende ta sigui skirbi y publica nan producto literario na Papiamento, sea individualmente of colectivamente.
For di un punto di bista cientifico literario ta interesante pa haya sa si nos ta un pueblo cu ta produci hopi literatura, si e literatura ey ta di cierto calidad of no, y ademas si nos tin hopi hende cu ta lesa e literatura ey di nos, of, hasta, cualke literatura mes y den ki medida. Pasobra, den termino general tin e pensamento cu, pa diferente motibo, nos ta un pueblo cu no gusta lesa literatura, y, hasta, cu nos pueblo no gusta lesa at all!
Hopi ta atribui e hecho ey na nos sistema di enseñansa den cual te ainda e gran mayoria di nos pueblo a siña lesa y ainda ta siña lesa na un lenga cu no ta nos prome lenga, Papiamento, sino na Hulandes, cu por mira como un lenga stranhero, un lenga cu no ta presente den tur nivel y ambito di nos sociedad y mucho menos den nos cultura (manera Papiamento si ta!), y cu esey ta un estorbo pa siña lesa y skirbi bon, y pa haya amor pa lesamento y consecuentemente pa lesamento di literatura.
Y tin ta bay hasta mas leu ainda alegando cu e maestronan mes, kendenan ta esnan cu mester siña e alumnonan lesa y skirbi, y e docentenan cu mester siña nan literatura, no sa lesa y no gusta lesa, y, como consecuencia, tampoco no tin e don y e maestria di por inculca den e muchanan amor pa lesamento y pa literatura, talbes pa e mesun motibo di nan enseñansa na Hulandes. Sinembargo, te ainda no tin prueba cientifico cu esey ta e realidad concreto na Aruba.
Pa cuminsa un discusion cu por hiba nos mas aleu den conocemento di nos literatura, di calidad di nos literatura, di lesamento di nos literatura, di lesamento en general y di amor pa lesamento (tambe di literatura), Joe Fortin (bibliotecario na Colegio Arubano, autor y lector), Joyce Pereira (ex-docente di Hulandes y di Papiamento, lector) y Ramon Todd Dandaré (ex-docente di Spaño y di Papiamento, lector) a invita e autornan Olga Buckley, Desi Correa, Quito Nicolaas, Jossy Tromp y Frank Williams, hunto cu e conocido investigado literario Wim Rutgers, pa un Encuentro Literario, den cual Autor ta topa Lector y Lector ta topa Autor, den Sala di Exposicion di Biblioteca Nacional di Aruba diamars dia 17 di december 2024, pa 6:00 or di atardi.
E maestro di ceremonia y alabes moderador ta Pamela de Coteau, kende lo guia e panel conforma pa e autornan y Wim, y e tres organisadonan como entrevistado. Unabes cu e entrevistadonan termina cu nan preguntanan na y e intercambio cu por tin cu e panelistanan, e publico presente lo haya su oportunidad pa participa door di haci pregunta y observacion y door di duna nan opinion al respecto. Durante e Encuentro e asistentenan tin ademas oportunidad di cumpra buki autografia di e autornan presente y di deleita nan mes na Café Lieverd, fuera di disfruta di poesia presenta pa Genevan Maduro, ganador di Arte di Palabra, y musica na encargo di Jersey Sophia. Entrada ta completamente gratis y tur hende ta bonbini. E Encuentro lo cuminsa precies 6:00 or!
