ORANJESTAD – Minister di Salud Publico, Sr. Dangui Oduber a bisa diamars via Top 95 Fm, cu den e dianan nos dilanti, por spera cu mas hende lo acudi na hospital pa coronavirus. Nos tin mas di 1000 caso activo y esaki sigur lo ocaciona cu mas hende lo mester asistencia medico.
E situacion actual ta cu tin lugar na hospital, pero loke no tin ta personal medico. Hospital ta trahando bao presion, pasobra no tin personal.
A manda pidi 47 personal extra, di cual 10 a yega Aruba. E prome 10nan cu a yega lo cuminza duna un leve alivio, pero ta spera cu pronto e demas 37 personanan por yega Aruba y dje forma aki lo no mester manda hende pa Colombia.
Tambe e minister a bisa cu tin data bon cla, cu e vacuna ta yudando.
Hendenan cu haye no ta bira dje malo ey y no ta yega cuido intensivo. Data ta mustra pues cu esnan cu a vacuna, ta haya un alivio pa pasa dor di dje.
