Tres cos cu ta haci hende liber, pasobra esey ta boluntad di Dios, pasobra si nos no pordona, Dios tampoco ta pordona nos.
Nos mester sinja nos yuinan for di chikito pa pordona, pasobra si e mucha ey no pordona, nos tin un mucha cu ta lanta cu falta di pordon den su curason, y amargura y tur e pakete completo di carga cu ta bini hunto cune tambe lo keda den su bida.
Ora nos pordona, aunke con dificil e situacion ta , nos carga ta wordo kita door di Dios,pasobra pordon ta algo spiritual, cu semper ta vence locual ta carnal, e ta vence rabia, e ta vence odio, e ta vence egoisimo, pasobra e ta bini directamente for di trono di Dios.
Pordon ta evita hopi tipo di malesa, por ehempel un atake di curason diripiente, presion halto, malesa di stoma,depresion, diabetis,salud mental, tur esey ta locual por presenta den nos bida ora nos no ta pordona.
Y tene cuenta ora cu nos no ta pordona nos relacion cu Dios ta debilita, pasobra Cristo Hesus a bisa cu cada bes ora nos ta para ta haci oracion , laga nos pordona si nos tin algo contra un hende, pa boso Tata tambe pordona boso, boso trangreshonnan.( Marco 11:25).
Kico bo ta pensa di un persona cu ta bisa cu e a pordona, pero tur dia ora e bini cas e ta start un pleito ( discuccion) riba mesun cos?
Kico bo ta pensa di un mayor cu ta bisa cu e a pordona su yiu, pero tur momento e ta tira e situacion den cara di su yiu.?
Kico bo ta pensa di un yiu cu for di chikito ta lanta cu rabia, contra su tata, cu su tata no a cria,no a zorg pe, cu hopi biaha su tata a ganje, y ta crece cu rabia, pa e falta di atencion cu e no a ricibi?
Kico bo ta pensa di un tata cu lanta y instiga e yiu contra su mama, pasobra e mama a bandona e tata y a bay cu otro homber.?
Kico ta pensa di un mama cu mescos ta lanta y instiga e yiu contra su tata , pasobra e tata a bay cu otro muher laga e mama, y hasta menciona cu e homber ey no ta bo tata, pa asina lanta un mucha cu un curason duro y amarga contra su propio tata?
Kico bo ta pensa di un persona cu cada bes cu e ta burachi, e ta bini cas y cuminsa busca problema cu su propio famia, insultando, y forma violencia pasobra e a bisa cu e a pordona, pero ora e ta burachi su mente ta bolter?
Un hende cu tin falta di pordon por contamina henter su famia, un hende asina por lanta henter su famia cu rabia contra otro hende, pasobra e no kier pordona, y por resulta hopi biaha cu esun cu no kier pordona ta e mes ta e ofensor.
Tin algo cu ta pasa hopi bao di hobennan, caminda un ta busca problema, y manda su enamorado bay bringa cu otro hende of ta busca problema pa su mayornan bay enfrenta otro hende, awel laga tur hende habri wowo, pasobra e tipo di manipulacion ey ta haciendo hopi danjo den nos comunidad.
Falta di pordon ta un strategia di diabel, pa cohe ventaha y dominio den bida di hende, asina amarga nan bida , aparta nan for di Dios , y destrui tur locual ta amor y amistad den nan bida.
Dios semper ta manda nos pordona.
Sinceramente Pastor Marcel Balootje