Porfin despues di casi un aña y mei di lucha, Comision 11, dialuna 15 september pa 11’or ta bay busca e registro di miembronan di CAPA.
Tur nos lucha tabata pa busca claridad ariba con e ladronicia di F 382.000,= a sosode.
Prome, Comision 11 a purba via di compromiso cu directiva di CAPA, nos a manda cartanan pa ricibi mas informacion ariba e ladronicia. Como miembro di CAPA, nos a pidi reunion cu directiva di CAPA. Tur reaccionnan di Directiva tabata negativo, hasta directiva a ignora nos peticion pa reunion, ni a contesta nos peticion. Directiva a busca un confrontacion cu Comision 11. Esaki ta e motibo cu comision 11 a dicidi di bay Juez y nos a ricibi rason di Juez pa nos di Comision 11 ricibi e registro di miembronan.
Declaracionnan controversial
Diabierna nos a ricibi un email di sr Duijneveld, den representacion di directiva di CAPA, cu pa dialuna 11’or nos por ricibi e registro di miembronan.
Straño y hopi mahos, sr Duineveld ta bisa cu directiva di CAPA no a bay den apelacion contra e caso cu Comision 11=miembronan di CAPA a gana, despues cu e mes, sr Duijneveld, a manda un carta via courier poco tempo pasa, cu directiva di CAPA ta bay apela e caso. Siman pasa diaranson, e Presidente di CAPA telefonicamente a bisa cu CAPA a apela e caso contra e decision di Juez na fabor di Comision 11. Ta comision 11 a mustra directiva di CAPA cu prueba cu nan NO a apela e caso. Pues directiva di CAPA no sa kico nan Abogado ta haci o no ta haci, directiva di CAPA ta desfuncional y incompetente.
Tambe sr Duijneveld ta bisa cu directiva di CAPA no ta di acuerdo cu e decision di JUEZ. CON?
- Den e statutonan bieuw art 30 y den e statutonan nobo cu e directiva aki mes a presenta mas o menos un aña pasa, e ta poni den articulo 34, cu ariba peticion di miembro(nan) despues di pago, ta ricibi e registro. Ta boso mes a trece den articulo 34;
- Aserca den e ley cu ta regarda e funcionamento di Cooperativanan na Aruba, AB 1987 nr GT 8, den articulo 11, lid 3, ta redacta mesun reglanan cu tin den statutonan di CAPA;
- Juez a duna un veredicto di acuerdo cu ley y cu statutonan di CAPA.
Ainda directiva di CAPA no ta di acuerdo. Wel,wel, e miembronan di directiva di CAPA no mester ta miembro mes di nos cooperativa, CAPA.
Pues cu nan ponencia anti-cooperativismo, mihor nan pidi retiro di CAPA.
Final
Pa tur hende por comprende, e lucha di Comision 11 ta pa trece claridad ariba con e ladronicia di F 382.000,=, cual no ta dosplaca, a sosode durante 9 luna.
