Diabierna pa 2.or di merdia un secreto lo keda revela: lo inicia e caso den corte di husticia, contra e persona Rasmijn cu ta sospecha di ta e asesino di Poentje Castro. Un acto cu a tuma lugar dia 22 pa 23 di December 2010 y cu te awe a keda sin wordo resolvi. Awor si Ministerio Publico kemen cu nan tin e caso cla y nan a pone man riba e asesino. Kico te motibo? Ningun hende sa ainda y nos ta confia cu manyan merdia Aruba lo haya sa dicon Rasmijn a tira Poentje mata y tambe con e por a sconde pa husticia pa asina tanto aña.
Rasmijn tabata cera pa droga na 2009 y na November 2009 el’a wordo sentencia pa 10 luna di prison. Den aña 2010 el’a sali di prison y e mes un aña ey el’a tira Poentje. Dia 20 di Juli 2009, el’a wordo gara na airport cu dos maleta di droga. Rasmijn tabata hopi rabia contra di e baas nan di droga, unda te hasta el’a basha abao riba nan, dunando husticia nan nomber, kende lo tabata un yiu di Corsow di faam F. Pues, obviamente Rasmijn tabata den circulo di baho mundo, pero no ta conoci dicon el’a mata Poentje. Lo ta riba un caso personal? Of el’a wordo paga pa haci tal? E caso lo wordo trata pro forma den corte dia 17 december, algun dia prome cu lo cumpli 11 aña..
