Porta pa Harmonia ta fortalece herencia cultural Arubiano cu musica y Dera Gay

Porta pa Harmonia, un iniciativa di Prome Minister Mike Eman, ta sigui brinda oportunidad na hubentud pa desaroya nan talento artistico mientras cu ta mantene nos herencia cultural bibo. Na december 2025, e programa a organisa un tayer di Dande cu e meta di fortalece e tradicion folklorico di Aruba.

Actualmente, den luna di juni, luna di celebracion di Dera Gay, e actividadnan ta continua cu un enfoke special riba musica tradicional. Docentenan di instrumento na Porta pa Harmonia a uni forsa pa siña e muchanan con pa toca ritmo di Dera Gay.

Vio Wester a subraya cu, aunke pa hopi alumno esaki ta nan prome experiencia cu e ritmo, e muchanan ta mustra hopi entusiasmo y gana di siña. Segun Wester, nan ta practica constantemente pa domina e ritmo y toca den harmonia. E proseso di enseñansa ta unoyen di satisfaccion, specialmente ora cu ta mira e progreso di e alumnonan.

Tico Kelly, docente di violin y cuarta, a expresa su orguyo di mira interes den musica y cultura Arubiano ta sigui crece. Segun Kelly, e proyecto ta un manera importante pa mantene tradicionnan bibo y pa percura cu hubentud sigui carga e herencia cultural di Aruba pa futuro. Hunto cu su studiantenan, nan ta prepara presentacionnan di Dera Gay unda ritmo, canto y instrumento ta combina den un experiencia cultural completo.

Marciano Godette a enfatisa cu percusion ta bay mas leu cu musica so. Segun Godette, percusion ta contribui na desaroyo di coordinacion, disciplina y sentido musical, cual tambe ta yuda muchanan den otro instrumentonan. Practica constante, segun Godette, ta e clave pa domina ritmo y conecta naturalmente cu musica.

Vanessa Croes, docente y directora di Seccion di Scol Basico di Scol Amplio Nos Cosecha, a subraya cu cultura, musica y arte ta esencial den e desaroyo integral di un mucha. Como parti di e curculo, studiantenan ta participa activamente den actividadnan cultural y presentacionnan di Dera Gay. E obhetivo ta un desaroyo holistico, unda cada studiante por desaroya creatividad, talento y expresion artistico.

Scol Amplio Nos Cosecha a expresa su gratitud na Porta pa Harmonia y Prome Minister Mike Eman pa brinda esaki como un oportunidad unico pa studiantenan y famianan.

Studiantenan tambe a comparti nan experencianan personal. Jadeveon Sanchez a indica cu e ta disfrutando di su lesnan di percusion y cu e ta descubriendo un manera nobo y special pa expresa su talento musical. Jeevan Albertus, kende ya tin experencia cu violin, ta sigui desaroya su habilidadnan mientras cu e ta conecta mas profundamente cu ritmo tradicional di Dera Gay.

Claire Sophie a destaca cu e ta disfrutando di lesnan di violin y cu poco poco e ta ganando mas confiansa den su habilidad musical. Mientras tanto, Dinzel Soto Soto a pone enfasis riba e balor historico di Dera Gay, splicando con cada cancion ta conta un historia cu a pasa di generacion pa generacion. Su meta ta pa algun dia representa e tradicion aki den un festival y sigui comparti e herencia cultural di Aruba.

En general, Porta pa Harmonia ta confirma su rol como un espacio unda musica, educacion y cultura ta uni pa forma un generacion nobo cu ta consciente y orguyoso di su identidad Arubiano.