Un grupo di empleadonan di Wit Gele Kruis (WGK) ta expresa nan precupacion tocante e fondo gubernamental cu e organisacion ta ricibi. Segun algun trahador, apesar cu Gobierno a destina miyones na WGK, hopi di nan nunca a ricibi beneficionan laboral cu nan mester a haya.

Un di e empleadonan, cu ta traha na WGK durante 15 aña, a bisa: “Mi nunca antes a ricibi ningun beneficio, solamente e ultimonan aña nan a cuminsa duna nos vakantie uitkering. Pero si Gobierno ta financia WGK cu milyones, con ta posibel cu nos no a ricibi loke ta pertenecenos?”

Ademas, ta existi duda riba e manera con a eligi e director nobo, Edwin Roos. Segun informacion, a habri un candidatura pa persona cu tin experiencia den e sector di zorg, pero hopi hende ta kere cu di antemano tabata cla cu Roos lo haya e puesto.

Esaki a lanta preocupacion den e grupo di trahadornan, cu a pidi pa tin investigacion tanto riba e board como riba e maneho interno, pa haya sa si e fondo gubernamental di subsidio a wordo usa na manera corecto. Segun algun trahador, entre 8 i 9 empleado nunca a ricibi e otro beneficionan cu nan tabata merece.

Empleadonan ta hasi un yamada na autoridadnan relevante, esnan cu ta controla subsidio, pa investiga e situacion aki i pa garantisa cu e fondo publico ta wordo maneha na manera transparante.

Solo di Pueblo ta cumpli cu peticion di trahador pa trece nan precupacion dilanti.

Ta conoci cu empleadonan di WGK semper a traha duro y desplega un trabao pisa. Nan no tine facil, pero semper a cumpli debidamente. Pues nan tambe merece beneficionan cu tur otro ta haya.