Lider di PPA, Otmar Oduber, durante conferencia di prensa a elabora riba e relacion cu Hulanda. E ta bisa cu si sin mas ta bisa como partido cu ta sostene cu ta dispuesto pa hinca den Rijkswet e Caft den e forma cu e ta na e momentonan aki, e ora no tin e respet ni ta compronde e lucha di nos antepasadonan perteneciendo na varios partido pa por conta awe cu nos Status Aparte dentro di Reino. Esaki ta algo cu e ta lamenta profundamente.
Pa partido PPA e intencion pa introduci e Caft den e Rijkswet pa haciele un Raft ta imposibel pa wordo acepta. “Mi ta puntra mi mes con otro partidonan, manera Futuro, AVP, Accion 21 y MAS, si mi no ta hera, ta bisa cu nan ta sostene un Caft den un Rijkswet, kiermen cu ta pone bo Parlamento un banda”.
Oduber ta compronde cu mirando con Parlamento ta funcionando na e momentonan aki, di berdad e no tin un balor, pero ta di opinion cu mester pone e respet un biaha mas, e autoridad cu mester den un Parlamento pa funciona independiente y traha na un forma cu ta na beneficio di comunidad.
Preguntanan di e lider di PPA ta e 4 partidonan aki ta: Bo ta acepta cu nos Florin stop di existi y bira Dollar manera cu ta wordo proponi den e pakete na e momentonan aki? Bo ta permiti y acepta e ora ey pa edad di pensioen wordo subi ten a 66 aña? Bo ta acepta pa bin cu eigenbijdrage pa loke ta cuido medico? Esakinan ta puntonan cu PPA categoricamente ta contra di nan y no lo aceptanan.
PPA no ta kere cu mester entrega manera cu tin den landspakket manera cu e partidonan aki si a vocifera cu nan ta dispuesto pa haci. PPA, al contrario, ta kere cu mester tin un relacion cu Hulanda caminda cu ta bay restaura e relacion di confiansa bek. Esaki por wordo haci a base di respet caminda cu tanto Oranjestad como Den Haag na un forma bilateral ta acorda riba cambio y manehonan cu mester wordo mara den diferente ley, pero nan mester ta leynan local, leynan di Aruba y no den Rijkswetnan. A traves di esakinan lo percura pa reduci gastonan di gobierno cual PPA ta e prome partido cu a bin dilanti cu reduccion di gasto di gobierno cu 12% y awor tin otro partidonan cu a cuminsa papia riba e topico aki tambe.
Cu otro palabra, por yega na acuerdonan cu Hulanda, caminda ta compromete, gana e confiansa bek y mustranan cu Aruba por cumpli y haci nos trabou manera debe ser,
Siguiendo riba e tema aki, Otmar Oduber a coregi un informacion incorecto presenta a e lider di partido Futuro cu a bisa cu na november di aña 2020 Prome Minister y Otmar Oduber lo a firma e acuerdo di Raft cu Hulanda.
“Mi tin cu corda e lider di partido Futuro cu Otmar Oduber a retira for di politica na 2019. Kiermen cu ta imposibel cu na 2020 mi persona por a firma cualkier documento cu Hulanda. E por ta sigur cu si mi tabatey, e tipo di documentonan aki no lo a wordo firma”. E ta di opinion cu ta importante pa papia berdad cu nos comunidad, pa papia e realidad y p’esey mes partido PPA a pone nan posicion bon cla.
Otmar Oduber ta bisa cu si por convence Hulanda cu nos ta reconoce, na prome lugar, cu erornan a wordo cometi for di nos Status Aparte te cu awe pa tur politico cu tabatey y sin un Parlamento cu mester tabatey pa controla y vigila gobierno, pero cu awo ta hinca e cambionan proponi pa PPA den leynan pa sigura cu ta cumpli den futuro, “nos ta convenci cu ora nos bay Den Haag, nos por bay convence Hulanda tambe cu e cambionan aki ta bay logra cu Aruba ta crea e stabilidad financiero y e disciplina di e maneho di presupuesto”.
