Salud mental ta bira cada dia mas un tema central den nos sociedad. Den e marco aki, parlamentario Eduard Pieters di fraccion di PPA a sinta siman pasa cu e representantenan di Psicologo Arubano Uni (PAU), e asociacion profesional di psicologonan na Aruba. E encuentro tabata enfoca riba e vision, e metanan y e rol crucial cu psicologia mester hunga den desaroyo di un sistema di salud mental mas fuerte pa Aruba.
Proteha proteccion y calidad di servicio
Presidente di PAU, Dimitri Halley, a presenta e direccion cu e asociacion ta deseando pa tuma pa fortalece e profesion y pa proteha calidad di servicio den psicologia na Aruba. “Fraccion di PPA ta contento y satisfecho di por a sinta cu e asociacion di psicologo,” Pieters a expresa. “Nan a presenta nan vision y metanan hopi importante pa e profesion di psicologia y pa calidad di servicio cu nan brinda na nos comunidad.”
Segun Pieters, un di e balornan mas importante di PAU ta cu e trata di un institucion local cu ta compronde e realidad social y cultural di Aruba. “Nan ta un institucion contextualisa pa Aruba, cu por compronde mihor e retonan cu nos hendenan ta enfrenta den loke ta trata salud mental.”
Ronda di consulta
E reunion cu PAU ta parti di un esfuerzo mas amplio di PPA pa scucha e profesionalnan den e veld. Prome cu esaki, e fraccion a tene e combersacionnan cu e organisacionnan manera Respaldo y Stichting Hunto, cual ambos ta traha activamente na bienestar y salud mental na Aruba. “Nos ta kere den scucha e pueblo y tambe e profesionalnan cu ta traha den e veld,” Pieters a declara. “Door di sinta cu nan, nos por compronde mihor e realidad di e sector.”
Sistema di salud holistico
Un punto importante den e encuentro tabata e necesidad pa tin un sistema di salud mental mas holistico. Segun Pieters, e profesionalnan dentro di sistema di salud mental no mester ta mira den un forma hirarkico, pero mas bien como disciplina cu mester traha hunto.
Psikiatra ta enfoca mas riba tratamento farmacologico, mientras e psicologonan ta traha mas profundo riba trauma emocional, comportacion humano, inteligencia emocional y cultural y dinamica social. “Psikiatra ta receta pilder, mientras psicologo ta traha mas integral cu e persona su “psyche”,” Pieters a splica. “Nan ta bay hopi mas profundo den e retonan cu un persona ta enfrenta.”
Factor legislativo
Pa Pieters, encuentro cu e profesionalnan manera PAU tambe ta esencial pa e trabou legislativo di Parlamento. “Como parlamentario, door di sinta cu e profesionalnan mes cu ta traha den e area aki, nos por compronde e veld mihor y e necesidadnan real di e sector.”
Finalmente, Pieters a enfatisa cu fraccion di PPA lo sigui comprometi pa fortalece e area di salud mental y pa defende e bienestar di e gruponan mas vulnerabel den nos comunidad. “Nos lo sigui busca e strategianan mas relevante y efectivo pa fortalece psicologia den e area di salud mental cu ta factibel, efectivo y eficiente pa Aruba” Pieters a afirma. Segun Pieters, salud mental no ta un tema secundario, sino un pilar fundamental pa construccion di un sociedad mas saludabel y mas fuerte pa futuro di Aruba.
